Гуржистон президенти легитим парламент ва давлат раҳбари сайланмагунча лавозимда қолишини маълум қилди

Гуржистон президенти Саломе Зурабишвили ваколат муддати тугаганига қарамай, лавозимдан кетмайди. Бу ҳақда у мамлакат аҳолисига йўллаган телемурожаатида маълум қилди.

Зурабишвили ўзини президент сифатида «ягона мустақил, легитим институт» деб атади. У яна бир бор октябр ойидаги сайловлар бўйича шакллантирилган парламент легитимлигини тан олмаслигини билдирди.

«Легитим парламент йўқ, шу боис легитим бўлмаган парламент президентни сайлай олмайди ва инагурация бўлиши мумкин эмас. Менинг мандатим парламент қонуний сайланиб, қонунга кўра, менинг ўрнимга бирор кимни сайламагунча давом этади. Мен сизлар биланман ва сизлар билан бўламан», — дейди Зурабишвили.

Октябр ойида Гуржистонда парламент сайловлари бўлиб ўтди. Овоз бериш натижаларига кўра, парламентда кўпчилик ўринни россияпараст ҳукмрон «Гуржистон орзуси» партияси қўлга киритди. Парламентга ўтган бошқа партиялар, шунингдек, мамлакат президенти Саломе Зурабишвили сайловлар натижаларини тан олмади.

Зурабишвили 2018 йилда ўтказилган тўғридан-тўғри сайловлар орқали давлат раҳбари сифатида сайланган. Унинг ваколат муддати 2024 йил 16 декабрда тугайди.

Ҳозирда фақат «Гуржистон орзуси» депутатлари иштирок этаётган Гуржистон парламентининг 26 ноябрдаги йиғилишида президентлик сайловларини жорий йилнинг 14 декабрда ўтказиш белгиланган, янги давлат раҳбарининг инаугурацияси эса 29 декабрда бўлиб ўтади. «Гуржистон орзуси» президентлик лавозимига собиқ футболчи Михаил Кавелашвилини номзод сифатида кўрсатган.