Навоийда 162 хонадонли “новостройка” 425 кишига сотилган. Жабрланувчилар терговдан норози

Kun.uz’га Навоий шаҳрида яшовчи бир гуруҳ фуқаролардан мурожаат келиб тушди.

Унда айтилишича, “Bright Industry Buldings The Future” МЧЖ таъсисчиси ва раҳбари Меҳрож Раҳматовга жиноят иши очилган. Мерей Омонбоева ишида жабрланувчи бўлган тадбиркор жуда кўп миқдорда фирибгарлик жиноятини содир қилганликда гумонланмоқда. Бу ҳақда Kun.uz манбаси хабар берди.

Меҳрож Раҳматов Навоий шаҳрида 148 та хонадон ва 14 та савдо дўконини жами 425 кишига сотган. 263 кишининг сотувдан тушган пул маблағларини эса ўзининг шахсий эҳтиёжлари учун сарфлаб, талон-торож қилган.

Ҳолат юзасидан 2024 йил 20 августда Навоий шаҳар ИИБ ҳузуридаги тергов бўлими томонидан Меҳрож Раҳматовга нисбатан Жиноят кодексининг 168-моддаси 4-қисми “а” банди (жуда кўп миқдорда фирибгарлик) билан жиноят иши қўзғатилган. Иш 26 августда Навоий вилоят ИИБ ҳузуридаги Тергов бошқармаси иш юритувига олинган. Ҳозирда иш юзасидан тергов ҳаракатлари олиб борилмоқда.

Тергов давомида Меҳрож Раҳматовга тегишли бўлган 12 та кўчмас мулк, жумладан, болалар боғчаси, бетон ишлаб чиқариш заводи, иссиқхона, балиқхона бинолари, шунингдек, 8 та транспорт воситаси хатланган. 

Етказилган зарар қопланмаган. Пулига куйиб қолаётганлар сони ва зарар миқдори жуда кўп бўлишига қарамай жабрланувчилар МЧЖ масъуллари қамоққа олинмаётганидан норози.

Жиноят-процессуал кодексининг 351-моддасига кўра, дастлабки тергов ҳаракатлари жиноят иши қўзғатилган кундан бошлаб уч ойдан ошмаган муддатда тамомланиши лозим. Бироқ 20 августда очилган жиноят иши ҳамон терговда. Терговнинг муддатида якунланмаганига икки сабабдан бирини келтириш мумкин: вилоят прокурорининг розилиги билан тергов муддати узайтирилган ёки иш бўйича айбланувчини (ёхуд унинг қаерда эканини) аниқлаш имкони бўлмагани учун ҳаракатдан тўхтатилган.

Жабрланувчиларнинг мурожаатига асосан ҳолат бўйича “Севимли” телеканали мухбири журналистик суриштирув ҳаракатлари ўтказишга киришган. Kun.uz манбасига кўра, вилоят прокурори А.Мирзаев шахсан мухбирни ўз хонасига чақириб, тайёрлаган лавҳасини эфирга бермасликни сўраган. Мухбир буни рад қилгач, вилоят прокурори телеканал раҳбариятига хат киритган.

Хатда айни кунда жиноят иши бўйича дастлабки тергов ҳаракатлари якунланмагани, мухбир томонидан тайёрланган лавҳа эфирга узатилса тергов ҳаракатларига халақит бериб қўйиши мумкинлиги билдирилган.