Тошкентда темирйўл транспортидаги инновациялар бўйича халқаро конференция ўтказилди

28-29 ноябрь кунлари Тошкентда ўтказилган “Тараққиёт магистраллари: темирйўл транспортидаги инновациялар” номли халқаро илмий-амалий конференцияда темирйўл техникасининг келажаги муҳокама қилинди. Конференция Трансмашхолдинг Корпоратив университети (Россия) ва Тошкент давлат транспорт университети (Ўзбекистон) томонидан ташкил этилди. Унда Ўзбекистон, Озарбойжон, Қозоғистон, Франция, Чехия ва Россиянинг олий ўқув юртлари ва йирик машинасозлик компаниялари вакиллари иштирок этди.

Ўзбекистон Республикаси транспорт вазирининг ўринбосари Жасурбек Чориев таъкидлаганидек, “Ўзбекистон сўнгги ўн йилликларда, хусусан темирйўл транспорти соҳасида муваффақиятли ривожланмоқда. ТМХ билан биргаликда метро вагонлари ва электропоездларни етказиб бериш бўйича йирик лойиҳаларни амалга оширмоқдамиз. Бугунги каби конференциялар тажриба алмашиш, ўқитиш, талабаларни стажировкадан ўтказиш ва олдинги бир неча йилга мўлжалланган вазифаларни муҳокама қилиш учун жуда муҳим”.

Конференциянинг асосий мақсади – ҳаракатланувчи таркибни ишлаб чиқариш, таъмирланиши ва модернизацияси билан боғлиқ долзарб муаммоларни таҳлил қилиш ва темирйўл соҳаси учун илғор ечимлар излаш.

“Темирйўл транспорти йирик шаҳарлар ўртасида ҳаракат қилиш, юк ташиш, тезлик ва тегишли тармоқларни ривожлантириш нуқтаи назаридан улкан салоҳиятга эга. ТМХ – Ўзбекистон учун муҳандислик кадрлари, илмий тадқиқотлар, инновацион техника ва шаҳар транспорти бўйича йирик саноат ҳамкордир. Шу сабабли муҳокама қилиш ва ўйлаб кўриш учун бизда муҳим масалалар бор”, – деди ТМХнинг корпоратив ривожланиш ва лойиҳа фаолияти бўйича бош директор ўринбосари, Бошқарув ҳайъати аъзоси Наталия Шишлакова.

Конференция иштирокчилари ўртасида муҳокама қилинган муҳим мавзулардан бири транспорт машинасозлиги соҳасида мутахассисларни тайёрлаш ва уларнинг малакасини ошириш масаласи бўлди. Конференция дастурида юқори тезликдаги магистраллар, транспорт соҳасини трансформация қилиш, ташишларни бошқариш, меҳнат хавфсизлиги ва атроф-муҳит муҳофазасига бағишланган етти секция бўлди. Ҳамкорликдаги иш натижасида 20 дан ортиқ илмий мақола ва мутахассисларни тайёрлаш бўйича бешта янги дастур яратилади.

“ТМХ машинасозлик соҳасида энг йирик ишлаб чиқарувчи сифатида ҳаракатланувчи таркибнинг кучли тузилмаси бўйича тамоман янги муҳандислик йўналишини ривожлантирмоқда. Биз жиддий равишда айта оламизки, келажак поездлари металлдан эмас, балки композит материаллардан ясалади. Биз Тошкент университети талабалари ушбу йўналишни ривожлантиришда иштирок эта олади деб ҳисоблаймиз”, – деди ТМХнинг Илғор технологиялар маркази директори Денис Карасёв.

Ўзбекистон ва Россия темирйўл соҳаси учун малакали мутахассисларни тайёрлашга қаратилган. ТМХ Корпоратив университети Тошкент давлат транспорт университети ва Турин политехника университети билан ҳамкорлик тўғрисидаги келишувлар доирасида таълим олиш, амалиёт ва гуруҳ корхоналарида ишга жойлашиш имкониятларини тақдим этади.

Бугунги кунда Ўзбекистон ва Россия темирйўл маъмуриятлари мавжуд лойиҳалар салоҳиятини биргаликда амалга оширмоқда ҳамда истиқболли йўналишларни ривожлантирмоқда. Ўзбекистонда ТМХ корхоналари ишлаб чиқарган юк электровозлари, магистрал ва маневр тепловозлари, метро вагонлари узоқ йиллардан бери ишлатиб келинмоқда. Ўзбекистон ва Россиянинг темирйўл соҳасидаги қўшма лойиҳаларини амалга ошириш миллий иқтисодиёт ўсишини таъминловчи муҳим омил эканлигини тушуниш керак. Ҳаракатланувчи таркиб ва инфратузилмани модернизация қилиш нафақат республика ва қўшни давлатлар ўртасида транспорт алоқаларини яхшилайди, балки Ўзбекистоннинг Марказий Осиёнинг асосий транзит хаби сифатидаги позициясини мустаҳкамлайди.