Хитой Тайванга кўрсатаётган ҳарбий ёрдами учун АҚШга қарши янги санкциялар қўллади

Хитой Вашингтоннинг Тайванга қурол сотиш борасидаги қароридан кейин 13 та АҚШ компанияси ва олти нафар топ-менежерни санкциялар рўйхатига киритди. Бу ҳақда ХХР Ташқи ишлар вазирлиги баёнотида сўз боради.

Пекиннинг фикрича, Вашингтоннинг қарори «Хитойнинг ички ишларига жиддий аралашиш ва мамлакат суверенитети ҳамда ҳудудий яхлитлигига путур етказиш бўлиб, «ягона Хитой» тамойили ва учта Хитой—Америка қўшма коммюникесини бузмоқда».

Шу боис Хитой ҳукумати ҳарбий технологияларга алоқадор Америка компанияларига санкциялар қўллади: Trieda Brown Engineering, BRINC Drones, Rapid Flight, Red Six Solutions, Shield Artificial Intelligence, Cynics, Firestorm Laboratories, Kratos Unmanned Systems, Havoc Artificial Intelligence, Niros Technologies, Cyberlux, Domo Tactical Communications ва Group W.

Уларнинг Хитойдаги мулклари музлатилади, Хитой фуқаролари ва ташкилотларига эса улар билан ҳамкорлик қилиш тақиқланади. Юқорида номлари келтирилган компаниялар Пентагоннинг қуролланиш бўйича янги шартномаларида тилга олинган.

Бундан ташқари, АҚШдаги ҳарбий саноат корхоналарининг олти нафар топ-менежери ҳам чекловларга тушган:

• Raytheon ҳарбий-денгиз бўлинмаси президенти Барбара Боргонови;
• унинг ўринбосари Жералд Шубел;
• Bayi Land and Weapons Systems бош директори Чарлз Вудберн;
• United Technology Systems Operations асосчиси ва бош директори Ричарт Кроуфорд;
• Data Link Solutions президенти Бет Адлер;
• BRINC Drones асосчиси ва бош директори Блейк Резник.

Октябр ойида АҚШ Тайванга 2 миллиард долларлик қуролланиш пакетини етказиши мумкинлигини эълон қилганди. Вашингтон Тайван билан расмий дипломатик алоқа ўрнатмаган, аммо қонунга мувофиқ, оролга ўзини ўзи мудофаа қилиши учун ҳимоя воситаларини етказиб беришга мажбур. Ноябр охирларида эса АҚШ Тайванга F-16 қирувчи самолётлари учун эҳтиёт қисмлар ва радиолокацион тизимлар етказиб бериши маълум бўлганди.