Еврокомиссия Руминиядаги президентлик сайловлари фонида TikTokʼка қарши тергов бошлайди

Еврокомиссия Руминиядаги президентлик сайловларининг биринчи турида европапараст кучларнинг мағлуб бўлгани фонида TikTok платформасига қарши расмий даражада босим кампаниясини бошлади.

Еврокомиссар Хенна Виркуннен ўзининг Х ижтимоий тармоғидаги саҳифасига мазкур қарор Россияга қаратилганини ёзиб қолдирди. Таъкидланишича, РФ TikTok орқали «Руминиядаги сайловларга таъсир кўрсатган».

«Эркин ва адолатли сайловлар — бу демократиянинг асоси. Еврокомиссиянинг рақамли хизматлар тўғрисидаги акти (ВЫФ) ўта йирик интернет платформалардан электорал жараёнлар учун хавфни камайтиришни талаб қилади. Бугун биз TikTokʼка фактларга асосланган воқеалар ривожи баҳолангунга қадар, Руминиядаги сайловларга боғлиқ барча маълумотларни сақлаб қўйишни буюрдик», — дейди Виркуннен.

Ўз навбатида Еврокомиссия матбуот хизмати ҳам ҳолат бўйича баёнот берди. Унга кўра, ЕК TikTokʼка сервис Руминиядаги сайловларга таъсир кўрсатиши мумкин бўлган «ҳар қандай ҳужжатларни ўз ҳолича сақлаш» бўйича кўрсатма берган.

DSA доирасидаги бундай кўрсатма Еврокомиссия томонидан интернет платформага қарши тегишли тергов бошлангани ёки тез орада бошланишини англатади.

Аввалроқ Руминия Конституциявий суди Марказий сайлов комиссиясига ўта ўнг россияпараст сиёсатчи Кэлин Жоржеску энг кўп овоз олган президентлик сайловларининг биринчи босқичи натижаларини қайта ҳисоблаш мажбуриятини юклаганди. 3 декабр куни эса Конституциявий суд президентлик сайловларининг биринчи босқичи натижаларини ҳақиқий деб топди.

«Янги Руминия» партиясидан президентликка номзод Себастян Попеску Жоржескуни сайловолди ташвиқотини молиялаштириш манбаларини яширганликда ва шу тариқа ўзини «шаффоф мустақил номзод» сифатида кўрсатиб, сайловчиларни чалғитаётганликда айбламоқда. Бундан ташқари, Попеску сўзларига кўра, Жоржескунинг TikTok платформасидаги сайловолди видеоларининг «вируслилик» кўламига фақат блогерлар ва рекламалар ёрдами билан эришиб бўлмайди. «Гап офиси Хитойда жойлашган TikTok’нинг тўғридан тўғри қўллаб-қувватлови ҳақида кетяпти», деди Попеску.