Қашқадарёда иситиш тизимидаги таъмирлашда салкам 1 млрд сўмни талон-торож қилган МЧЖ аниқланди

Қашқадарё вилояти Кўкдала туманида иситиш тизимини таъмирлашда 934,4 миллион сўмни ўзлаштирган МЧЖ раҳбари аниқланди, деб хабар беради Бош прокуратура ҳузуридаги департамент.

Қайд этилишича, департаментнинг Кўкдала тумани бўлими томонидан терговга қадар текширув ўтказилган. Текширувда «S-TH.» МЧЖ масъул шахслари ва бошқалар ўзаро тил бириктириб, тумандаги ижтимоий соҳа объектларининг иситиш тизимида бажарилган қурилиш-таъмирлаш ишларида расмий ҳужжатларга амалда бажарилмаган ишларни қўшиб ёзгани аниқланган.

Улар жами 934,4 миллион сўм бюджет маблағларини ҳамда ушбу ижтимоий соҳа объектларини иситиш учун олиб келинган 79 тонна кўмирни талон-торож қилган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.

Аввалроқ Наманганда аҳолига етказиб берилиши керак бўлган 13 тонна кўмир талон-торож қилингани, Сурхондарёда эса тегишли ҳужжатлари бўлмаган 100 тонна кўмирни 100 миллион сўмга сотган фуқаро ушлангани тўғрисида хабар берилганди.