«Афросиёб» поезди энди Каттақўрғонда ҳам тўхтаб ўтади

«Афросиёб»нинг Каттақўрғон бекати ташкил этилади, деб хабар беради Самарқанд шаҳар ҳокимлиги матбуот хизмати.

Қайд этилишича, «Самарқанд вилоятида инвестиция ва тадбиркорлик муҳитини янада ривожлантириш ҳамда аҳоли турмуш даражасини яхшилаш чора-тадбирлари тўғрисида»ги қарори президент қарори билан тасдиқланган «Самарқанд вилоятининг туман (шаҳар)ларини ижтимоий-иқтисодий ривожлантириш бўйича қўшимча чора-тадбирлар дастури»да ушбу бекат фаолиятини йўлга қўйиш белгиланган.

Транспорт вазирлиги ва «Ўзбекистон темир йўллари» акциядорлик жамиятига 2025 йилда «Афросиёб» поездининг Тошкент—Бухоро йўналишида Каттақўрғон пунктига тўхтаб ўтишини ҳамда Самарқанд—Каттақўрғон электр поезди йўналишларини ташкил этиш вазифалари топширилган.

Шунингдек, Булунғур—Самарқанд шаҳри—Жума—Каттақўрғон шаҳри йўналишида электр поезди қатновини йўлга қўйиш белгиланган. Бунинг учун замонавий поезд вагонлари олиб келиш, оралиқ тўхташ темирйўл бекатлари инфратузилмасини яхшилаш режалаштирилган.

Аввалроқ «Афросиёб» тезюрар поездлари 7 декабрдан Хивага қатнай бошлаши рад этилганди. Бухоро ва Хива шаҳарлари ўртасида тезюрар Афросиёб поезди қатнови йўлга қўйилиши тўғрисида 2021 йилда хабар берилган. Ўшанда Осиё тараққиёт банки Ўзбекистон ғарбидаги йирик шаҳар марказларини боғловчи 465 километрлик темирйўл линиясини электрлаштириш, темирйўл хизматларини яхшилаш ҳамда минтақада савдо ва туризмни ривожлантириш учун 162 миллион долларлик кредит ажратилишини маъқуллаган эди.

Эслатиб ўтамиз, 2019 йил 2 февралдан бошлаб, Тошкент—Бухоро—Тошкент йўналишида қатнаётган «Афросиёб» юқори тезликда ҳаракатланувчи замонавий поездлари Жиззах вокзалида 2 дақиқа тўхташи йўлга қўйилган эди.