Макрон Илон Маскни Германиядаги сайловларга аралашишда айблади

Франция президенти Эммануэл Макрон америкалик миллиардер ва Х ижтимоий тармоғи эгаси Илон Маскни Европа сиёсатига аралашишда айблади. Бу ҳақда у француз элчилари қаршисида қилган чиқиши давомида қайд этган.

Макрон Маскнинг исмини айтмаган, аммо Politico’нинг ёзишича, унинг нутқидан гап бизнесмен ҳақида кетаётганини тушуниш мумкин бўлган.

«10 йил олдин дунёдаги энг йирик ижтимоий тармоқлардан бирининг эгаси сайловларга, шу жумладан, Германиядаги сайловларга бевосита аралашишини ким ҳам тасаввур қилганди», — дейди Франция президенти.

Макрон ўз нуқти давомида, шунингдек, Украинадаги уруш мавзусига ҳам тўхталиб ўтган. Унинг фикрича, Киев «ҳудудий масалалар бўйича реалликка хос музокараларни» олиб бориши керак.

«Европа Украина учун муҳим хавфсизлик кафолатини зиммасига олаётган бир пайтда АҚШ бизга вазиятни ўзгартиришга ёрдам бериши ва Россияни музокаралар столига ўтиришга кўндириши керак», — дея таъкидлайди Макрон.

Унинг қайд этишича, АҚШнинг сайланган президенти Доналд Трампнинг можарони қисқа муддатда ҳал этиш борасидаги ваъдасига қарамай, «Украина учун бундай тез ва осон ечим бўлмайди». Макрон, шунингдек, Европа давлатлари Россия урушда ғалаба қозонишига йўл қўйиб бера олмаслигини, чунки бу халқаро тартиб ва Европа хавфсизлигини хавф остига қўйишини билдирган.

Декабр ўрталарида Илон Маск парламент сайловлари арафаси ўнг популистик «Германия учун муқобил» (ГуМ) партиясини қўллаб-қувватлашини билдирдганди. «Германияни фақат ГуМ қутқариши мумкин», — деб ёзган у Х ижтимоий тармоғига. Германияда муддатидан олдин парламент сайловлари 23 феврал куни бўлиб ўтади.