Парижда собиқ президент Саркози Қаззофий фондидан 50 млн евро олгани бўйича суд эшитуви бошланди

Париж жиноий судида Николя Саркозига нисбатан президентлик кампаниясини ноқонуний молиялаштириш иши бўйича янги эшитувлар бошланди. Франция собиқ президенти 2007 йилда ўзининг сайловолди штабига Муаммар Қаззофийга боғлиқ Ливия фондларидан 50 миллион евро маблағ жалб этганликда гумонланмоқда.

«Николя Саркозига яқин бўлган бир неча киши Ливия ҳукуматидан молиявий қўллаб-қувватлов олиш учун баъзида расмий, баъзан норасмий тарзда воситачи ролини ўйнаб келган», — дейди терговчилар. Ушбу молиявий ёрдам Ливия режимига «дипломатик, иқтисодий ва суд қўллаб-қувватлови» эвазига тақдим этилган.

Прокуратура терговни 2013 йилда «коррупция» ва «таъсир ўтказиш» айбловлари билан бошлаган. Айблов томонининг гувоҳи — бизнесмен Зиад Такиеддиннинг таъкидлашича, 2006 йил охири — 2007 йил бошида у ўша вақтдаги ички ишлар вазири бўлган Николя Саркози ҳамда унинг канцелярияси бошлиғи Клод Геанга 5 миллион евро берган. Аммо тергов давомида унинг кўрсатмалари бир неча бор ўзгарган.

2007 йили президентлик пойгасида ғалаба қозонган Николя Саркози Ливия раҳбарига нисбатан босимни камайтириш учун кўп ишларни қилган, хусусан, ўша йилнинг декабрида Парижда Қаззофийни қабул қилган. Шунингдек, у ташриф аввалида француз ҳукумати томонидан разведка бошлиғи ўринбосари ва Қаззофийнинг куёви Абдулла Сенуссини ҳибсга олиш учун берилган ордерни бекор қилишга уринган. Сенусси 1989 йил 19 декабр куни Франциянинг UTA компаниясига тегишли самолётда уюштирилган теракт ташкилотчиси ҳисобланади. Фожиа оқибатида 170 нафар йўловчи ва экипаж аъзолари ҳалок бўлганди. Ливия 2004 йилда қурбонларнинг оилаларига компенсация тўлашга рози бўлган.

Франция собиқ президентининг айби исботланса, у 10 йил муддатга озодликдан маҳрум этилиши, катта миқдорда жаримага тортилиши ва қатор фуқаролик, жумладан, сайлаш ва сайланиш ҳуқуқларидан айрилиши, шунингдек, давлат лавозимларини эгаллаш имкониятидан маҳрум бўлиши мумкин. Николя Саркозининг ўзи ва унинг адвокатлари айбловларни бутунлай рад этмоқда.

Декабр ойида Париж кассация суди Франциянинг собиқ президенти Николя Саркозига нисбатан коррупция, таъсир ва терговга босим ўтказиш иши бўйича ҳақиқий бир йиллик қамоқ жазосини назарда тутувчи апелляция судининг қарорини ўзгартиришни рад этганди.