Андижонда 518 млн сўмлик газдан ноқонуний фойдаланган чойхона аниқланди

Андижон ва Наманган вилоятларида табиий газдан ноқонуний фойдаланиш ҳолатлари фош этилди, деб хабар беради «Ҳудудгазтаъминот» матбуот хизмати.

Қайд этилишича, «Ҳудудгаз Андижон» ГТФ комплаенс назорат тузилмалари ва «Улуғнортумангаз» ГТБ ходимлари иштирокида Улуғнор тумани, «Келажак» МФЙда жойлашган «А.Ф.Г.» МЧЖга қарашли умумий овқатланиш масканида (чойхона) табиий газдан фойдаланиш ҳолати тафтишдан ўтказилган.

Текширув жараёнида истеъмолчи табиий газ тармоғига маънан эскирган ва носоз ҳисоблагич ўрнатиб, ностандарт ускуналар орқали етти дона ўчоқ, бир дона чой қайнатиш жиҳози ва бир дона иситиш қозонида табиий газдан ноқонуний фойдаланиб келгани аниқланган. Ҳолат бўйича далолатнома тузилиб, табиий газ сарфи қайта ҳисоб-китоб қилинган ва 518 миллион сўмлик зарар ҳисобланган.

Шунингдек, Наманган шаҳрида ўтказилган текширувлар давомида, фуқаро А. Т. га тегишли новвойхонада қонунбузилиш ҳолати аниқланган. Маълум бўлишича, истеъмолчи табиий газ тармоғида тегишли лойиҳа техник ҳужжатларисиз ва ҳисоблагичсиз уланиб, ресурсдан ўғринча фойдаланиб келган. Ҳолат бўйича қонунда кўрсатилган тартибда қайта ҳисоб-китоб жараёнлари олиб борилиб, 628,6 миллион сўмлик зарар аниқланган.

Ҳолатларга оид барча ҳужжатлар ҳуқуқни муҳофаза қилувчи органларга топширилган.

Аввалроқ Самарқандда 1,33 млрд сўмлик газдан ноқонуний фойдаланган новвойхона аниқлангани тўғрисида хабар берилганди.