Байден гиёҳванд моддалар иши бўйича қамалган қарийб 2,5 минг кишининг жазосини енгиллаштирди

АҚШ президенти Жо Байден гиёҳванд моддалар билан боғлиқ жиноятларни содир этгани учун қамалган қарийб 2,5 минг кишини афв этди. Америка етакчисининг бу борадаги баёноти Оқ уй сайтида эълон қилинди.

«Бугун мен зўравонлик ҳаракатларини амалга оширмай, гиёҳванд моддалар билан боғлиқ жиноятларда айбланиб, амалдаги қонунчиликка тўғри келмайдиган даражада узоқ муддатга ҳукм этилган 2,5 мингга яқин кишининг жазосини енгиллаштирмоқдаман», — дейди Байден.

Таъкидланишича, ушбу ҳаракат тарихий хатоларни тузатиш, ҳукм чиқаришдаги номутаносибликни бартараф этиш ва муносиб одамларнинг панжара ортида узоқ вақт ўтирганидан кейин ўз оилалари ҳамда жамоаларига қайтишига имкон бериш йўлидаги муҳим қадамдир.

Афв этиш тўғрисидаги қарор Байден АҚШ президентлиги лавозимидан кетишига бир неча кун қолганида қабул қилинмоқда. 20 январ куни АҚШнинг сайланган президенти Доналд Трампнинг инаугурацияси бўлиб ўтади.

Декабр охирларида АҚШ президенти федерал судлар томонидан ўлимга ҳукм қилинган 37 нафар маҳбуснинг жазосини енгиллаштирганди. Жо Байден уларнинг жазосини муддатидан олдин шартли озод этилиш имкониятисиз умрбод қамоқ жазосига ўзгартирган. Шундан сўнг афв этилганларнинг икки нафари президент қароридан норози бўлиб, судга шикоят аризаси киритган.

Ундан олдинроқ АҚШ президенти Жо Байден ўғли Ҳантерни афв этганди. Ҳантер Байденга қарши ноқонуний қурол сақлаш ва солиқ тўлашдан бўйин товлаганлик учун иш очилган эди. Оқ уй раҳбари америкаликлар ота ва президентнинг ўғлини афв этиш қарорини тушунишларига умид билдирган.