Лукашенко Беларусда интернетни чекламасликка ваъда берди

Шунингдек, у блогерлар фаолиятини тақиқлаш бўйича бирор чора кўрилмаслигини айтди. «Биз ҳеч қачон бу ҳақида ўйламаганмиз», деди Беларус президенти.

Фото: РИА Новости

Беларус ҳукумати мамлакатда интернетга чеклов жорий этиш ва блогерларни тақиқлаш бўйича чоралар кўришни режалаштирмаяпти. Бу ҳақда республика президенти Александр Лукашенко маълум қилди.

Лукашенконинг таъкидлашича, кўпчилик, айниқса, чет элдаги беларуслар мамлакатда бўлиб ўтадиган президентлик сайловларидан олдин интернет чекланиши ҳақида гапирмоқда. «Биз ҳеч қачон бу ҳақида ўйламаганмиз. Интернетни хоҳлаяпсизми — ўтираверинг у ерда», — дейди Лукашенко Минксдаги автозавод ишчилари билан мулоқотда.

Беларус президентининг ҳисоблашича, блогерлар фаолияти давлат учун муаммо туғдирмайди ва бирор-бир чекловчи чораларни кўришга ҳожат йўқ.

«Тақиқлаш — бу осон: тақиқлайсан — ўтирасан, хурсанд бўлиб. Тақиқлар ҳар доим ҳам фойда бермайди. Ғалаба қозониш лозим. Биз яхшироқ эканимизни исботлашимиз керак», — дейди Лукашенко.

Шу билан бирга, у давлат хавфсизлиги ва суверенитетини сақлашга тааллуқли масалалар бўйича барча зарур чораларни кўришини айтиб ўтган.

Беларусда президентлик сайловлари 2025 йил 26 январда бўлиб ўтади. Лукашенко 1994 йилдан бери республика президенти сифатида фаолият юритиб келмоқда ва бу сафар у еттинчи марта сайловларда ўз номзодини илгари суради.

2020 йил 9 август кунги президентлик сайловларидан кейин Лукашенконинг ғалабаси эълон қилингач, Беларусда ярим йилдан ортиқ вақт оммавий норозилик намойишлари бўлиб ўтганди. Мухолифат Лукашенконинг истеъфосини, сиёсий маҳбуслар озод этилиши ва янги сайловлар ўтказилишини талаб қилди. Норозилик акциялари кучишлатар тузилмалар томонидан куч билан бостирилганидан кейин тўхтаган эди.

#Александр Лукашенко #Беларус