Британия мудофаа вазири Россиянинг «айғоқчи кемаси» ҳудудий сувларга кирганини маълум қилди

«Янтар» Ла-Манш бўғозининг Британия соҳилларидан 45 мил узоқликда пайқалган. Шундан сўнг уни мамлакат ҳарбий-денгиз флотининг икки кемаси кузатиб қўйган.

Фото: Британия Мудофаа вазирлиги

Буюк Британия мудофаа вазири Жон Ҳили Россиянинг «Янтар» океанографик кемаси Британия ҳудудий сувларига кирганини маълум қилди, деб хабар бермоқда BBC.

Унинг сўзларига кўра, 20 январ куни «Янтар» Ла-Манш бўғозининг Британия соҳилларидан 45 мил узоқликда пайқалган. Уни мамлакат ҳарбий-денгиз флотининг икки кемаси кузатиб қўйган.

BBC мақоласида «Янтар» «айғоқчи кема» дея таърифланган. Ҳилининг маълум қилишича, ушбу воқеа — «кучайиб бораётган Россия босқинига» яна бир мисолдир. «Президент Путин бу хабарни эшитишини истайман: биз сизларни кўрдик, нима қилаётганингизни биламиз ва мамлакатимизни ҳимоя қилиш учун қатъий чоралар кўришдан қочмаймиз», — дейди мудофаа вазири.

Ҳили, шунингдек, бу охирги ойларда «Янтар» Британия ҳудудий сувларига кирган иккинчи ҳолат эканини қўшимча қилган. Ноябр ойида Россия кемаси муҳим сувости қувурлари ва кабеллари ҳудудида «патруллик» билан шуғулланган вақтида Ирландия денгизидан кузатиб қўйилган эди.

Россия томони «Янтар»да фақат тадқиқот учун мўлжалланган ускуналар борлигини таъкидлаб келади. Шу билан бирга, 2015 йилда АҚШ Ҳарбий-денгиз флоти «Янтар» бортидаги аппаратлар интернет кабелларни қирқиб юборишга қодир эканини маълум қилганди.

#Буюк Британия #Янтар