Лос-Анжелес яқинида янги ёнғин бошланди. Ўн минглаб маҳаллий аҳоли эвакуация қилинди

Калифорниянинг Лос-Анжелес округида янги ёнғин юзага келди ва бир неча соат ичида 38 километр квадрат майдонни эгаллади, деб хабар беради Reuters.

«Ҳюз» ёнғини 22 январ куни маҳаллий вақт билан соат 11:00 да Лос-Анжелес шаҳридан 80 километр шимолда жойлашган Кастаик кўли ҳудудида бошланган. CNN’нинг маълум қилишича, ёнғин юзага келган ҳудудда асосан буталар ўсади ва яйлов жой ҳисобланади, бир қисмини эса ўрмонлар эгаллаган.

Ҳукумат Кастаик кўли атрофида яшовчи аҳолини ёнғин уларнинг ҳаётига хавф туғдириши мумкинлигидан огоҳлантирган. 31 мингга яқин одам мажбурий эвакуация буйруғини олган, шунингдек, яна 23 минг киши бошқа жойга кўчирилиши мумкин. Лос-Анжелес округ шериги Роберт Лунанинг айтишича, ёнғин туфайли Кастаик округ қамоқхонасидаги маҳбуслар қисман эвакуация қилинган.

Лос-Анжелес округи ўт ўчириш хизмати бошлиғи Энтони Марроненинг маълум қилишича, «Ҳюз» ёнғини ҳали тўхтатилмаган. Уни ўчиришга салкам 4 минг ўт ўчирувчи жалб этилган. Марроненинг сўзларига кўра, ёнғин ҳозирча бирорта иншоотга зарар етказмаган.

Лос-Анжелес округида ёнғинлар қурғоқчил об-ҳаво фонида 7 январ куни бошланган эди. 22 январга келиб, ўт ўчирувчилар иккита йирик ёнғин ўчоғини назоратга олган: 57 километр квардатни эгаллаган «Итон» ва 95 километр квадратни яксон қилган «Палисейдс».

Ёнғинлар оқибатида ҳозирга қадар 28 киши ҳалок бўлган, 16 мингга яқин иншоот ёниб кетган ёки шикастланган, 180 минг киши эвакуация қилинган. Ёнғинлар етказган зарар 250 миллиард долларга баҳоланмоқда.