АҚШ Мексика чегарасига яна 1,5 минг ҳарбий хизматчини юборади

АҚШ Мексика орқали ноқонуний мигрантларнинг мамлакатга киришига чек қўйиш мақсадида яна 1,5 минг аскарни чегарага жўнатишга тайёрланмоқда, деб хабар беради Anadolu Ajansi.

Нашрнинг Вашингтондаги манбасига кўра, Шимолий Каролинада жойлашган 18-ҳаво-десант корпусининг моддий-техник таъминот бригадаси мамлакат жанубий чегараларига бориш кўрсатмасини олган.

Амалдорнинг сўзларига кўра, президент Трамп «миграциянинг олдини олиш бўйича кучайтирилган босимни қўллаб-қувватлаш мақсадида» яна 1,5 мингга яқин ҳарбий хизматчини жанубий чегарага юборади.

Чегарага жойлаштирилиши режалаштирилган янги қўшин АҚШ ва Мексика ўртасига тиканли сим тўсиқлар ўрнатиш, шунингдек, чегара патрулига зарур транспорт, разведка ва бошқа кўмакларни кўрсатиш билан шуғулланади.

Трамп президентлик лавозимига киришганидан бери Пентагон 1,6 минг кишилик ҳарбий бўлинмани чегарага жойлаштирган. Бундан ташқари, 500 нафарга яқин денгиз пиёдаларини жиноят содир этган ноқонуний мигрантлар сақланувчи Кубадаги Гуантанамо базасига юбориш бўйича қарор қабул қилган.

Аввалроқ, АҚШ президенти Доналд Трамп мамлакатдаги мигрантлар билан боғлиқ вазиятга эътибор қаратиб, АҚШ-Мексика чегарасида фавқулодда ҳолат эълон қилган ва назорат-ўтказиш пунктларини ёпган эди. Шунингдек, у ноқонуний мигрантлар оммавий депортация қилинишини айтди. Мексика АҚШ ҳудудига ўтмоқчи бўлган ноқонуний мигрантлар учун асосий транзит мамлакати ҳисобланади.