Путин биринчи марта Суриянинг янги президенти билан телефон орқали мулоқот қилди

Россия президенти Владимир Путин биринчи марта Суриянинг ўтиш даври президенти Аҳмад аш-Шаръа билан телефон орқали мулоқот қилди, деб хабар беради Кремл матбуот хизмати.

Қайд этилишича, мулоқот давомида Россия етакчиси Суриянинг ижтимоий-иқтисодий ривожланишига, жумладан, инсонпарварлик ёрдами орқали ёрдам беришга тайёрлигини маълум қилган. Кремлга кўра, телефон мулоқоти «конструктив, ишга оид ва мазмунли» кечган.

«Суриядаги мавжуд вазият юзасидан атрофлича фикр алмашилди. Россия томонидан Сурия давлатининг бирлиги, суверенитети ва ҳудудий яхлитлигини қўллаб-қувватлаш бўйича ўз принципиал позицияси билдирилди», — дейилади хабарда.

Владимир Путин «Аҳмад аш-Шаръага мамлакатнинг янги раҳбарияти олдида турган масалаларни ечишда муваффақият тилаган». Икки мамлакат етакчилари, шунингдек, савдо-иқтисодий, таълим ва бошқа соҳалар бўйича ҳам ҳамкорлик масалаларини муҳокама қилган. «Икки томонлама ҳамкорликни ривожлантириш бўйича кенг кўламли кун тартибини ишлаб чиқиш учун ушбу турдаги фойдали алоқаларни давом эттиришга келишиб олинди», — дея таъкидланади Кремл хабарида.

Эслатиб ўтамиз, Россиянинг расмий делегацияси 28 январда Сурияга борганди. Россия Федерацияси ташқи ишлар вазири ўринбосари Михаил Богданов ва Россия президентининг Сурия бўйича махсус вакили Александр Лаврентев Дамашқда музокаралар ўтказган.

Маълумот учун, Россиянинг Сурияда иккита асосий базаси бор — Тартусдаги ҳарбий-денгиз базаси ва Латақиядан тахминан 20 километр жануби-шарқда жойлашган Ҳмеймим ҳарбий-ҳаво базаси. Аввалроқ Сурия мудофаа вазири Мурҳеф Абу Қасра мамлакатнинг янги ҳукумати Россия ҳарбий базаларини агар улар Сурия манфаатларига жавоб берса, сақлаб қолишга тайёрлигини маълум қилганди.