Трамп ўзини Маскдан «ажратишга» уринишлар ҳақида гапирди

АҚШ президенти Доналд Трамп Америка оммавий ахборот воситалари уни миллиардер ва Ҳукумат самарадорлиги департаменти (DOGE) раҳбари Илон Маскка қарши қўйишга уринаётганини айтди. Бу ҳақда сиёсатчи тадбиркор билан Fox News телеканалига берган қўшма интервьюсида айтиб ўтди.

Суҳбатда дастур бошловчиси Американинг нуфузли нашрларида Маскнинг ҳокимиятни узурпация қилиб олгани ва Трампга таъсири ҳақида ёзилган мавзуларга тўхталиб ўтди.

АҚШ президентининг таъкидлашича, оммавий ахборот воситалари уни тадбиркорга қарши қўйиш истаги яққол кўриниб турибди. Сиёсатчининг сўзларига кўра, журналистлар «бу борада ёмон иш қиляпти». Трампнинг фикрича, агар бундай мақолалар муваффақиятли чиққанида президент бўлмас эди.

«Мен буни ҳар доим кўряпман. Дарҳақиқат, Илон менга қўнғироқ қилди ва: «Улар бизни ажратмоқчи», деди. Мен: «Мутлақо [тўғри]», дедим», деди Трамп.

Интервьюда АҚШ президенти ва Маск Америка фуқаролари ақлли эканини айтиб, президент маъмурияти ва DOGE федерал ҳукуматнинг кераксиз харажатларини камайтириш учун биргаликда ишлаётганини тушунишларини таъкидлади.

Маск Трампнинг сайловолди кампаниясига қарийб 75 миллион доллар хайрия қилди ва бу уни сайлов даврининг энг йирик донорларидан бирига айлантирган эди. Шунингдек, у бир неча бор сиёсатчини қўллаб-қувватловчи митингларда сўзга чиққан ва унга муҳаббатини тан олган.

Трамп ҳокимиятга келганидан кейин Маск ҳукумат самарадорлиги департаменти (DOGE) раҳбари этиб тайинланди.

2024 йил декабрь ойида The Washington Post Маскни «хуфёна президент» деб атади. 2025 йил февраль ойида TIME журнали АҚШ президентлик курсисида ўтирган Маск тасвирланган муқова билан чиқди.