Meta бутун сайёра бўйлаб сувости интернет кабелини тортади

Meta компанияси бутун дунё бўйлаб 50 минг километрли сувости кабелини тортиш режаси ҳақида эълон қилди, деб хабар беради BBC.

Технологик гигантнинг маълум қилишича, Waterworth лойиҳаси АҚШ, Ҳиндистон, Жанубий Африка, Бразилия ва бошқа минтақаларни ўзаро боғлайди. У тарихдаги энг узун сувости кабели бўлиши кутилмоқда.

Таъкидланишича, Meta ижтимоий тармоқлардан ташқари, сунъий интеллект (СИ) ва уни қўллаб-қувватловчи инфратузилмалар соҳасидаги иштирокини ҳам кенгайтиришга уринмоқда. Компанияга кўра, унинг янги кабели бешта қитъани бир-бири билан боғлайди ва СИ соҳасидаги лойиҳаларни ривожлантиришга ёрдам беради.

«Лойиҳа иқтисодий ҳамкорликни кенгайтириш имконини беради, рақамли технологияларни ёйишга кўмаклашади ва ушбу минтақалардаги технологик ривожланиш имкониятларини очади», — дейилади корпорация хабарида.

Мазкур лойиҳа ҳақида ўтган йилнинг декабрида маълум бўлганди. Ўшанда компания режасини амалга ошириш учун 10 миллирад доллар инвестиция талаб этилиши тахмин қилинганди.

Meta интернет кабелларини тортиш бўйича бошқа лойиҳаларда, жумладан, Echo и Bifrost, Havhingsten, Amite и Anjana’да ҳам иштирок этиб келади. Бундан ташқари, компания айни вақтда дунёдаги энг узун кабел тизими — 2Africa’нинг асосий эгаси ҳисобланади. Январ ойида Meta Тайван ва АҚШни боғлаб турувчи ORCA интернет кабелини тортиши тўғрисида хабар берилганди.