Москвадагилар Эммануэл Макронга жавоб қайтарди

Россия президенти матбуот котиби Дмитрий Песков ҳар кунги матбуот брифингида Франция президенти Эммануэл Макроннинг Европа хавфсизлигини кучайтириш зарурлиги ва Украинанинг урушдаги мағлубиятига йўл қўйиб бўлмаслигини айтган халққа мурожаатини кескин танқид қилди. Песков Макроннинг чиқишини «жуда ва жуда зиддиятли» деб атади.

Нутқ, ҳақиқатан ҳам, ўта зиддиятли. Уни тинчлик ҳақида ўйлайдиган давлат раҳбарининг нутқи сифатида қабул қилиш қийин. Айтилганлардан шундай хулоса чиқариш мумкинки, Франция кўпроқ уруш ҳақида, урушни давом эттириш ҳақида ўйламоқда.

Песков, шунингдек, Макрон ўз нутқида «Россияни деярли душман, Франциянинг рақиби деб атагани»дан, бироқ «НАТО ҳарбий инфратузилмаси доимий равишда Россия чегаралари томон сездирмай яқинлашгани» ҳақида гапирмаганидан нолиди.

Россия ташқи ишлар вазири Сергей Лавров ҳам худди шундай оҳангда муносабат билдирди. У Макроннинг ядро қуроли ҳақидаги баёнотларини «Россияга таҳдид» деб билишини айтди ҳамда Наполеон ва Адолф Ҳитлерни «Макроннинг ўтмишдошлари» деб 
атади.

«Россияга қарши жанг қилишни хоҳлаган ўтмишдошлари Наполеон, Ҳитлердан фарқли ўлароқ, жаноб Макрон унчалик нозик ишламаяпти, чунки улар тўғридан тўғри „Россияни забт этишимиз керак, Россияни мағлуб этишимиз керак“ дейишарди. Афтидан, у ҳам худди шу нарсани хоҳлайди, лекин негадир у Францияни мағлуб этмаслиги учун Россия билан курашиш зарурлигини, Россия Франция ва Европага таҳдид солаётганини айтади», — дейди россиялик вазир.

Лавров, шунингдек, Москва Украинага хорижий тинчликпарвар кучлар киритилиши масаласида «муросага ўрин кўрмаётгани»ни очиқ айтди. «Бу муҳокама очиқчасига душманлик мақсадида олиб борилмоқда. Улар бу нима учун кераклигини яширмайди», — деди Россия ТИВ раҳбари.

Бунгача Россия ҳукумати Украинада тинчликпарвар кучларни жойлаштириш ғоясини тўғридан тўғри рад этмаётганди. Хусусан, Песков шунчаки бундай эҳтимол ҳақида гапиришга ҳали эрта эканини таъкидлаш билан чекланган.

Макроннинг мурожаати

Макрон 5 март куни кечқурун миллатга мурожаат билан чиқди. У Россияни «Франция ва Европа учун таҳдид» деб атаб, Москванинг «Украинада тўхташи»га шубҳа билдирди.

«Биз украиналикларга қаршилик кўрсатишда ёрдам беришда давом этишимиз керак, токи улар Россия билан ўзлари ва барчамиз учун мустаҳкам тинчлик ҳақида келиша олгунча. Шунинг учун тинчлик йўли Украинадан воз кечиш орқали бўлиши мумкин эмас. Бутунлай аксинча.

Тинчликка ҳар қандай йўл билан ва Россия диктатураси остида эришиб бўлмайди. Тинчлик Украинанинг таслим бўлиши эвазига бўлмаслиги керак. Тинчлик унинг ҳалокати билан бўла олмайди. Тинчлик ўт очишни тўхтатиб туришни ҳам англатмайди… Бизда ўтмиш тажрибаси бор. Россия 2014 йилда Украинага бостириб киришни бошлагани ва ўшанда биз Минскда ўт очишни тўхтатишга келишиб олганимизни унутмаслигимиз керак. Ўша Россия бу сулҳга риоя қилмади. Бугун биз Россиянинг бир сўзига ҳам ишона олмаймиз», — деган у.

Макрон бу Европа кучларини жойлаштиришни ҳам талаб қилиши мумкинлигини айтиб, «бу кучлар олдинги сафда жанг қилмаслиги, сулҳ имзолангандан сўнг унга тўлиқ риоя этилишини кафолатлаш учун ўша ерда бўлиши»ни қўшимча қилган.

Франция президенти, шунингдек, «Европадаги иттифоқчилар билан ядровий тийиб туриш бўйича» мунозара бошлашга қарор қилганини айтди. Франция Европа Иттифоқида ядро қуролига эга бўлган ягона давлатдир. Аввалроқ Макрон Париж Европа хавфсизлигини таъминлаш учун Европанинг бошқа давлатларига ўз ҳудудида ядро қуролини жойлаштиришни таклиф қилмоқчи эканини айтганди.

{Yii::t(}

Ўтказиб юбориш 6s

Ўтказиб юбориш

Франция аҳолиси (Германия аҳолисидан фарқли ўлароқ) Украинага ёрдамни давом эттириш тарафдори

Франция аҳолисининг деярли учдан икки қисми (64 фоизи) Украинага ҳарбий ёрдам кўрсатишни давом эттириш тарафдори, дейилади BFMTV телерадиокомпанияси буюртмасига биноан Elabe социология институти томонидан ўтказилган сўровномада. Сўровнома Оқ уйда Украина ва АҚШ президентлари ўртасида рўй берган тортишувдан сўнг ўтказилган.

Қўллаб-қувватлашни давом эттириш зарурлиги ҳақида гапирганларнинг 44 фоизи уни ҳозирги даражада сақлаб қолиш керак деб ҳисоблайди, 20 фоизи эса уни ошириш кераклигини айтади. Респондентларнинг 18 фоизи қўллаб-қувватлашни қисқартириш зарурлигини, 17 фоизи эса бутунлай тўхтатиш зарурлигини таъкидлаган.

BFMTV қайд этишича, 2024 йил ёзидан бошлаб Франциянинг Украинани янада қўллаб-қувватлаш тарафдори бўлган аҳолиси сони ортиб бормоқда (Европанинг бошқа мамлакатларида тескари тенденция кузатилмоқда).

Франция аҳолисининг аксарияти Украинага француз тинчликпарвар кучларини юбориш ғоясини ҳам қўллаб-қувватламоқда — аммо фақат ҳарбий ҳаракатлар тўхтатилиб, Россия билан тинчлик шартномаси имзолангандан кейин (67 фоиз). Жанглар давом этаётган бир пайтда эса, респондентларнинг 68 фоизи Украинага қўшин юборишни номақбул деб ҳисоблайди.

Украинанинг Европа Иттифоқига қўшилиши масаласида французларнинг фикрлари деярли тенг тақсимланган: 35 фоизи Киев Европа Иттифоқига урушдан кейин, 31 фоизи — ҳозир қўшилишини қўллаб-қувватлайди, 33 фоизи эса бунга умуман қарши.

Франция аҳолисининг Украинага ҳарбий ёрдам кўрсатишни давом эттириш зарурлиги ҳақидаги фикри Европа Иттифоқининг бошқа йирик иқтисодиёти — Германия аҳолисининг фикридан анча фарқ қилади. Феврал ойи охирида Германияда бўлиб ўтган парламент сайловлари фонида ўтказилган сўров шуни кўрсатдики, немисларнинг деярли ярми (46 фоиз) бўлажак ҳукумат Киевга молиявий ёки ҳарбий ёрдам кўрсатишини истамайди. Мамлакат аҳолисининг атиги 28 фоизи қурол-яроғ ва пул билан қўллаб-қувватлаш давом эттирилиши керак, деб ҳисоблайди, мос равишда 7 ва 8 фоизи эса ёрдам фақат молиявий ёки фақат ҳарбий бўлиши кераклигини билдирган.