Трамп Эрон етакчисига ядровий дастур бўйича битим тузишни таклиф қилди

АҚШ президенти Доналд Трамп Эрон олий раҳнамоси оятуллоҳ Али Хоминаийга мактуб йўллаб, Эрон ядровий дастури масаласида музокаралар ўтказишни таклиф қилди. Оқ уй раҳбари Теҳрон Вашингтон билан музокараларга боришига умид билдирган.

«Пайшанба куни Эрон етакчисига мактуб йўлладим, Эрон билан битим тузишни яхшироқ деб биламан. У музокаралар олиб боришига умид билдиришимни, чунки бу Эрон учун анча яхши бўлишини айтдим», — дейди Трамп Fox Business телеканалига берган интервюсида.

Шунингдек, у Эрон томони «бундай мактуб олишни хоҳлаган бўларди» деди. Доналд Трамп яна бир бор «Эрон ядровий қуролга эга бўлмаслиги кераклигини» қайд этди.

Bloomberg 12 феврал куни Доналд Трамп Россия президенти Владимир Путин билан телефон орқали мулоқотда ундан АҚШ ва Эрон музокараларида воситачилик қилишни сўрагани ҳақида ёзганди. Агентлик маълумотларига кўра, ушбу мавзуни Россия ва АҚШ делегациялари 18 февралда Саудия Арабистонида ўтказилган учрашувда ҳам муҳокама қилган. Таъкидланишича, Россия воситачилик қилишга рози бўлган ва Вашингтон Теҳрон билан унинг ядровий дастури бўйича келишувга эришишга қизиқиш билдирмоқда.

Аввалроқ Эрон Ташқи ишлар вазирлиги матбуот хизмати раҳбари Исмоил Бекайи Буюк Британия, Германия ва Франция ядровий музокараларни давом эттириш бўйича келишувга эришганини маълум қилганди.