Эрон АҚШ билан музокара ўтказишни рад этди

Ўз манфаатларини қондириш учун музокара таклиф этаётганлар билан Эрон ҳамкорлик қилмайди, деди мамлакат олий раҳбари Али Хоминаий.

«Айрим қудратли давлатларнинг музокаралардаги таклифлари муаммоларни ҳал қилиш учун эмас, балки ҳукмронлик қилиш ва ўз умидларини рўёбга чиқаришга қаратилган. Эрон уларнинг умидларини албатта қабул қилмайди», деди у.

Хоминаий ҳеч қандай давлат ёки сиёсатчи ҳақида гапирмади. Аввалроқ, АҚШ президенти Доналд Трамп Эрон раҳбариятига мактуб йўллагани, мамлакатнинг ядровий қуроли билан боғлиқ хавотирлар юзасидан музокаралар олиб боришни таклиф қилганини айтган эди. Шу билан бирга, Эроннинг БМТдаги ваколатхонаси Теҳрон ҳеч қандай мактуб олмаганини маълум қилди.

Хоминаий, шунингдек, Эрон Европада ядровий битим бўйича ўз мажбуриятларини бажармаганликда айбланаётганини айтди.

«Сиз Эрон ўз мажбуриятларини бажармаганини даъво қиласиз. Хўш, ўзингиз бу мажбуриятларни бажардингизми? Сиз биринчи кунданоқ беҳаракатсиз», деди олий раҳбар.

Хоминаий Қўшма Штатларнинг ўзи ядро келишувидан чиққанини (Трамп буни биринчи президентлик даврида қилган) ва Европа «қандайдир тарзда айбини ювишга» ваъда берганини, бироқ ҳеч нарса қилинмаганини таъкидлади.

Трамп ўтган ой Эрон билан янги ядровий келишувга эришиш имкониятини кўтарган эди. У Эронни «бомбардимон қилмасдан» келишувга эришмоқчи эканлигини айтди ва Эрон ҳам буни хоҳласа керак, деди. 7 март куни Америка президенти Эрон билан муносабатларда «қизиқ вақтлар» яқинлашганини айтди.

Эрон президенти Масъуд Пизишкиён март ойи бошида АҚШ билан музокаралар олиб бориш зарур, деб ҳисоблаган эди. Бироқ Хоминаий бунга қарши чиқди – президент эса бунга эътироз билдиролмайди.