Bloomberg: АҚШ Канада билан бирга Россиянинг «соядаги флоти»ни кузатишдан бош тортди

АҚШ ҳукумати Канаданинг Россия «соядаги флоти»ни кузатиш учун махсус гуруҳ тузиш тўғрисидаги таклифини рад этди. Бу ҳақда Bloomberg вазиятдан хабардор манбаларига таяниб хабар берди.

Қайд этилишича, таклиф «катта еттилик» давлатлари ТИВ раҳбарларининг саммити якуни бўйича қабул қилиниши керак бўлган денгиз масалалари тўғрисидаги қўшма баёнотни тайёрлаш вақтида кўриб чиқилган. G7 саммити 12-14 март кунлари Канаданинг Квебек провинциясида бўлиб ўтади.

Агентликнинг аниқлашича, АҚШ Канада таклифига нафақат вето қўйган, балки қўшма баёнотдан Россияга нисбатан «санкциялар» ва унинг Украинада «уруш олиб бориш қобилияти» жумлаларини ўчириб ташлашни талаб қилган.

Феврал ойида Financial Times газетаси АҚШ Украинадаги урушга уч йил тўлиши муносабати билан ўтказилган G7 саммити қўшма баёнотида Россиянинг «босқинчи» деб аталишига қарши чиққани ҳақида ёзганди.

Эслатиб ўтамиз 4 март куни АҚШнинг Канада товарлари импортига 25 фоизли божлари кучга кирди. Бунга жавобан Оттава Америка товарларига ҳам шу каби божларни жорий этди. Шундан сўнг Доналд Трамп Канада маҳсулотлари учун божларни икки баробарга оширишни ваъда қилди, Жастин Трюдо эса Америка президентини савдо урушини бошлашда айблади.