Исроил Ғазо бўйича музокараларни давом эттириш учун Доҳага делегация юборади

Исроил делегацияси 10 март куни Ғазо секторида ўт очишни тўхтатиш ва гаровдагиларни озод этиш бўйича ҲАМАС билан музокараларни фаоллаштириш учун Қатарга йўл олади. Бу ҳақда Исроил бош вазири канцелярияси маълум қилди.

Тинчлик сулҳининг биринчи босқичи якунланган, томонлар унинг иккинчи босқичи бўйича ҳали келишувга эришмади.

Баёнотда айтилишича, Исроил воситачилар, хусусан, АҚШ таклифини қабул қилган ва делегациясини Доҳага юбориш қарорига келган.

«Исроил АҚШ томонидан қўллаб-қувватланаётган воситачилар таклифига рози бўлди ва музокараларда натижага эришиш мақсадида душанба куни Доҳага делегация юборади», — дейилади хабарда.

АҚШ ҲАМАСга таклиф қилган битимда келтирилишича, гаровда сақланаётган 10 нафар исроиллик ўт очишни 60 кунга тўхтатиш эвазига озод этилади.

Таъкидланишича, музокаралар АҚШ да ҲАМАС ўртасида Қатар ҳамда Миср воситачилигида ўтказилмоқда, Исроил томони бунга аралашмаяпти.

Аввалроқ АҚШ президенти Доналд Трамп ҲАМАС ҳаракатига «охирги огоҳлантириш» бериб, гаровга олинганларнинг барчасини зудлик билан озод қилишни талаб этган эди. Бироқ ҳаракат бу таҳдидни эътиборсиз қолдириб, Исроил билан келишувнинг иккинчи босқичига ўтилмагунча ҳеч ким озод этилмаслигини маълум қилган.

Исроил ва ҲАМАС ўртасида ўт очишни тўхтатиш келишувининг биринчи босқичи 27 феврал куни якунланган. Унда гаровдаги 33 нафар исроиллик 1890 нафар фаластинлик асир эвазига қайтарилди.