Трамп Канададан пўлат ва алюминий импортига 50 фоизгача қўшимча божлар жорий этади

АҚШ президенти Доналд Трамп савдо вазирига Канададан пўлат ва алюминий импорт қилишга 50 фоизгача бўлган қўшимча божларни жорий этишни буюрганини эълон қилди.

Трампнинг маълум қилишича, божлар 12 мартдан кучга киради. АҚШ президенти ушбу қадамни Канада томонидан электр энергиясига ўрнатилган 25 фоизли божларга жавоб деб атади.

Бундан ташқари, Трамп Канада турли АҚШ сут маҳсулотларига 250 фоиздан 390 фоизгача бўлган фермер хўжаликлари тарифларини «зудлик билан бекор қилиши» кераклигини айтди. «Тез орада мен хавф остида бўлган электр энергиясига нисбатан фавқулодда ҳолат эълон қиламан», — деб ёзади Трамп Truth Social ижтимоий тармоғига.

Шунингдек, Трамп агар «Канада чидаб бўлмайдиган узоқ муддатли бошқа божларини бекор қилмаса», 2 апрелдан бошлаб АҚШга олиб кириладиган автомобиллар учун божни «сезиларли даражада» ошириш билан таҳдид қилди. Унинг сўзларига кўра, бу «Канададаги автомобил бозорини том маънода бутунлай ёпиб юборади».

Трампнинг қўшимча қилишича, Канада «АҚШнинг ҳарбий ҳимоясига ишонган ҳолда миллий хавфсизлик учун жуда кам тўламоқда». «Биз Канадани йилига 200 миллиард доллардан ортиққа субсидиялаймиз. Нимага? Бундай давом этиши керакмас. Маънога эга ягона нарса — бу Канада бизнинг 51-штатимизга айланишидир. Бу барча божлар ва бошқа нарсаларнинг бутунай йўқолишига сабаб бўлади», — деб ёзади Трамп.

4 март куни АҚШнинг Канада товарлари импортига 25 фоизли божлари кучга кирди. Бунга жавобан Оттава Америка товарларига ҳам шу каби божларни жорий этди. Шундан сўнг Доналд Трамп Канада маҳсулотлари учун божларни икки баробарга оширишни ваъда қилди, Жастин Трюдо эса Америка президентини савдо урушини бошлашда айблади.