Россия Давлат Думаси раиси Тошкентга расмий ташриф билан келди

Россия Давлат Думаси раиси Вячеслав Володин расмий ташриф билан Ўзбекистонга келди. У мамлакат раҳбарияти билан учрашади ва Олий Мажлиснинг иккала палатасига ташриф буюради. Бу ҳақда Россия Давлат Думаси хабар берди.

Қайд этилишича, 2022 йилда Володин Ўзбекистон пойтахтига ташриф буюрганида Давлат Думаси ва Олий Мажлис Қонунчилик палатаси ўртасида ҳамкорлик бўйича парламентлараро комиссия тузиш тўғрисида келишув имзоланган эди. Думанинг аниқлик киритишича, биринчи йиғилиш 2024 йил 19 февралда бўлиб ўтган ва унга Володин ва Қонунчилик палатаси спикери Нурдинжон Исмоилов раислик қилган.

2025 йил февраль ойида Россия президенти Владимир Путин ва Ўзбекистон президенти Шавкат Мирзиёев телефон орқали мулоқот чоғида икки давлат ўртасидаги сармоявий ҳамкорлик ва саноат кооперациясининг ўсишини муҳокама қилган эди. Икки мамлакат ўртасидаги савдо-иқтисодий ва сармоявий ҳамкорликнинг асосий кўрсаткичлари ўсиш динамикасини таъминлашга алоҳида эътибор қаратилди.

Февраль ойида Россиянинг Ўзбекистондаги савдо вакили Константин Злигостев сўнгги 6 йил ичида Россия ва Ўзбекистон ўртасидаги товар айирбошлаш ҳажми қарийб икки баравар кўпайганини ва 2024 йил охирига келиб 10 миллиард доллардан ошганини маълум қилди. Шунингдек, у икки давлат ўртасидаги ҳамкорликни ривожлантириш учун истиқболли тармоқлар: энергетика, кимё ва тоғ-кон саноати, қишлоқ хўжалиги, озиқ-овқат саноати ва юқори технологиялар эканини таъкидлади.