Трамп Путиннинг ўт очишни тўхтатиш борасидаги баёнотини «умидбахш, лекин тўлиқ эмас» деб атади

АҚШ президенти Доналд Трамп Владимир Путиннинг Россия—Украина урушига оид 30 кунлик сулҳ тўғрисидаги баёнотини «умидбахш» деб атади.

«Путин умидбахш баёнот билан чиқиш қилди», — деди Трамп НАТО бош котиби Марк Рютте билан биргаликда ўтказилган матбуот анжуманида. Аммо АҚШ президентининг фикрича, ушбу баёнот «тўлиқ» бўлмаган.

Трамп ўт очишни тўхтатиш таклифини Путин билан муҳокама қилишга тайёр эканини тасдиқлади. Унинг сўзларига кўра, АҚШ президентининг Яқин Шарқ бўйича махсус вакили Стив Уиткофф ҳозир «Россияда жиддий музокаралар» олиб бормоқда ва у тез орада Путин билан учрашиши режалаштирилган.

«Россия тўғри йўл тутишига умид қиламан», — дея қўшимча қилди Трамп.

Рютте иштирокида ўтказилган матбуот анжуманида АҚШ президенти Вашингтон вакиллари ўт очишни тўхтатиш битими доирасида Украина делегацияси билан нималар ҳақида гаплашганини очиқлади. Хусусан, улар ҳудудлар ва Запороже АЭС устидан назоратни, шунингдек, Украинанинг НАТОга аъзолиги масаласини муҳокама қилган.

«Биз [Украина билан] ҳудудларни муҳокама қилдик, чунки агар сулҳдан маъно бўлмаса, унга вақт сарфлашни хоҳламаймиз. Шундай экан «Қаранглар, сизлар буни ололасиз, буни эса йўқ», деяпмиз. НАТО ва унга аъзолик масаласи муҳокама қилинди. Ҳамма жавобни билади, у 40 йилдан бери маълум. Якуний келишувнинг кўплаб тафсилотлари аллақачон муҳокама қилинган. Энди Россия тайёрми ёки йўқлигини кўрамиз. Агар тайёр бўлмаса, бу бутун дунё учун жуда умидсизликка солувчи ҳолат бўлади», — дейди Трамп.

АҚШ Саудия Арабистонида Украина делегацияси билан ўтказилган музокараларда 30 кунга ўт очишни тўхтатиш таклифини илгари сурган эди. Украина томони бунга рози бўлди.

Владимир Путин сулҳ тўғрисидаги ғояга изоҳ бераркан, Россия Украинада ўт очишни тўхтатиш таклифига рози бўлган, бироқ у узоқ муддатли тинчликка олиб келган тақдирдагина. Сулҳ ҳақидаги таклиф бир қанча нюансларни ҳисобга олиши керак, деган президент. Хусусан, унинг сўзларига кўра, Киев 30 кунлик ўт очишни тўхтатиш режимидан қурол олиш ёки куч сафарбар этиш учун фойдаланиши хавфи бор.