Трамп «Озодлик радиоси» ва «Америка Овози» радиосини назорат қилувчи агентликни қисқартирмоқчи

АҚШ президенти Доналд Трамп бюрократияга қарши кураш баҳонасида бир қанча агентликларнинг функциялари ва ходимлари сонини имкон қадар қисқартирадиган янги қонунни имзолади. Тегишли ҳужжат Оқ уй томонидан эълон қилинди.

Улар орасида «Озодлик радиоси» ва «Америка Овози» радиосини назорат қилувчи АҚШ ҳукуматининг Глобал Медиа агентлиги (USAGM) бор.

Бундан ташқари, рўйхатга Вудро Вилсон маркази, Федерал воситачилик ва келишув хизмати, Музей ва кутубхона хизматлари институти (АҚШ музейлари ва кутубхоналарни қўллаб-қувватлайди), Уйсизлар бўйича идоралараро кенгаш, Молиявий ривожланиш институтлари жамғармаси, Озчиликлар бизнесини ривожлантириш агентлиги ва Арктика тадқиқот комиссияси киритилди.

Қонунга кўра, ташкилотлар бир ҳафта ичида ўз филиаллари вазифалари тўғрисида ҳисобот тақдим этиши керак бўлади.

Февраль ойида АҚШ ҳукумати самарадорлиги агентлиги (DOGE) раҳбари, америкалик тадбиркор Илон Маск «Озодлик радиоси» ва «Америка Овози» радиосини ёпишга чақириб, уларда «ўзи билан гаплашадиган радикал сўл аҳмоқлар» ишлаётганини айтди.

Аввалроқ Доналд Трамп Associated Press (AP) журналистларини Оқ уйда ўтказиладиган мабуот тадбирларига киришини тақиқлаб қўйган эди. Агентлик ўз хабарларида Мексика кўрфазини Америка кўрфази деб номлашдан бош тортди. Трамп ўз қарорига кўра, ушбу географик номни ўзгартирган эди. AP агентлиги Оқ уйдан четлатилиши ҳақидаги қарор юзасидан судга мурожаат қилди, аммо ҳозирча муваффақият қозона олмади.