Тошкент вилоятида 29 та кичик ва микро ГЭС қурилади

Станциялар учун давлат захирасидан ер майдони ажратилди.

Тошкент вилоятида давлат захирасидаги қишлоқ хўжалигига мўлжалланмаган 6,7 гектар ер майдони Энергетика вазирлигига доимий фойдаланиш ҳуқуқи билан ажратилди. Бу майдонларда кичик ва микро гидроэлектр станциялар қурилади, деб хабар берди вилоят ҳокимлиги.

Қайд қилинишича, Гидроэлектр станциялар «Энергия тежовчи технологияларни жорий қилиш ва кичик қувватли қайта тикланувчи энергия манбаларини ривожлантириш бўйича қўшимча чора-тадбирлар тўғрисида»ги президент фармони талаблари асосида, Тошкент вилояти ҳокимининг тегишли қарори билан қурилади ва фойдаланишга топширилади.

Станциялар вилоятнинг Нурафшон, Чирчиқ, Ангрен шаҳри ҳамда Чиноз, Паркент, Янгийўл, Бўка, Зангиота, Оққўрғон, Оҳангарон туманларида қурилади ва лойиҳа қуввати 2550 кВт ни ташкил қилади.

#Тошкент вилояти #электр энергияси #ГЭС