Халқаро космик станцияда 9 ой қолиб кетган астронавтлар Ерга қайтмоқда

NASA астронавтлари Бутч Уилмор ва Суни Уилямс космосдаги тўққиз ойлик сафардан сўнг ниҳоят Ерга қайтмоқда, деб ёзади BBC. Улар Халқаро космик станцияда (ХКС) саккиз кун қолиши керак эди, бироқ техник муаммолар сабабли уларнинг миссияси узоқ муддатга чўзилиб кетди.

Уилмор ва Уилямс NASA астронавти Ник Ҳейг ҳамда россиялик космонавт Александр Горбунов билан бирга SapceX капсуласида Ерга қайтяпти. Улар 18 март куни Гринвич вақти билан 05:05 да ХКСдан ажралиб чиққан ва соат 21:57 да Флориданинг қирғоқлари яқинига қўниши кутилмоқда.

Аввалига SapceX компаниясининг Dragon капсуласи катта тезликда Ер атмосферасига киради, бунда унинг ҳарорати Целсий бўйича 1600 даражагача қизийди. Сўнг капсула тезлиги камайиб боради ва астронавтлар Ер тортиш кучидан тўрт баравар катта бўлган ортиқча юкланишга бардош бериши керак бўлади. Ниҳоят, аппарат тўртта йирик парашют ёрдамида океанга юмшоқ тарзда қўнади.

Суни ва Бутчнинг саёҳати 2024 йил июнда бошланган эди. Астронавтлар Boeing компанияси томонидан яратилган Starliner космик кемасининг биринчи синовида иштирок этди.

Космик станцияга парвоз вақтида капсулада қатор техник муаммолар кузатилди, шу боис астронавтларнинг унда уйга қайтиши хавфли деб топилди. Ўтган йилнинг сентябрида Starliner Ерга экипажсиз қайтди. Бу эса Бутч ва Сунини қайтариш учун янги кема кераклигини англатарди. Шунинг учун NASA сентябр ойида ХКСга борган SapceX капсуласини танлади.

Dragon капсуласида станцияга тўрт нафар астронавт ўрнига икки киши учиб борди — Бутч ва Суни учун бўш жой қолдирилди. Муаммо шунда эдики, SapceX парвози 6 ойга мўлжалланганди, натижада астронавтларнинг ХКСда қолиш муддати 2025 йил март ойига қадар чўзилиб кетди.

SapceX капсуласи 16 март куни эрталаб тўрт нафар астронавтни — Энн МакКлейн ва Никол Айерс, япониялик астронавт Такуи Ониси ва россиялик космонавт Кирилл Песковни Халқаро космик станцияга етказди. Энди эса Ерга Бутч Уилмор, Суни Уилямс, Ник Хейг ва Александр Горбунов қайтмоқда.