АҚШ бир кунда ҳар бири беш миллион доллардан мингта «олтин карта» сотди

«Олтин карта» хорижликларга АҚШда доимий яшаш ҳуқуқини беради.

Фото: Mario Tama/Getty Images

АҚШ Савдо вазири Ҳовард Лютник бир кун ичида чет элликларга мамлакатда доимий яшаш ҳуқуқини берувчи 1000 та «олтин карта»ни бой инвесторларга сотганини айтди.

«Айтганча, мен кеча мингта [Олтин карта] сотдим», деди Лютник 20 март куни All-In Podcasts подкастига берган интервьюсида. Суҳбат қайси куни ёзиб олингани аниқ эмас.

Савдо вазири интервьюда дунёда Қўшма Штатлар «олтин карта» сотиши мумкин бўлган 37 миллион одам борлигини айтди. Унинг сўзларига кўра, агар «бирор даҳшатли иш қилса» АҚШ расмийлари «олтин карта»ни эгасидан олиб қўйиши ҳам мумкин.

АҚШ президенти Доналд Трамп 25 февраль куни март ойида «олтин карта» дастурини ишга туширилишини кутаётганини айтди, бу дастур эгаларига Қўшма Штатларда доимий яшаш ҳуқуқини ва келажакда Америка фуқаролигини беради. Битта картанинг нархи, Трампнинг сўзларига кўра, тахминан беш миллион долларни ташкил қилади. Трампнинг фикрича, АҚШ бу карталардан миллионтани сотиши мумкин.

Тайёрлаган: Сардор Юсупов

#АҚШ #миграция #Олтин карта