Сергелида янги қурилаётган бинода ёнғин юз берди

Хонобод кўчасида жойлашган кўп қаватли уйларнинг бирида ёнғин чиқди. Ҳодиса оқибатида ҳалок бўлган ва жабрланганлар йўқ.

Фото: Ижтимоий тармоқлар

Тошкент шаҳар Фавқулодда вазиятлар бошқармаси Сергели туманида янги қурилаётган бинода содир бўлган ёнғин тўғрисида маълумот берди.

Қайд этилишича, 23 март куни соат 09:18 да Сергели тумани Хонабод кўчасида жойлашган, янги қурилаётган бино фасад қисмида ёнғин содир бўлаётгани тўғрисида пойтахт ФВБга хабар келиб тушган.

Шунга кўра, ёнғин-қутқарув техникалари этилган манзилга соат 09:24 да етиб бориб, ёнғин соат 09:39 да қуршаб олинган ва соат 09:42 да ўчирилган.

«Ёнғин оқибатида ҳалок бўлган ва жабрланганлар йўқ. Ҳозирда ёнғин сабаби ва келтирилган моддий зарар миқдори аниқланмоқда», — дейилади хабарда.

Эслатиб ўтамиз, феврал бошларида Яккасарой тумани Кичик ҳалқа йўли кўчасида жойлашган янги қурилаётган бино ертўласида ёнғин содир бўлганди.