Қашқадарё вилоятида ИИБнинг қатор мулозимлари ишдан олинди

Ички ишлар вазири Азиз Тошпўлатов Қашқадарё вилоятида комплекс инспекторлик текшируви натижалари юзасидан ҳисобот йиғилиши ўтказди, дея хабар бермоқда вазирлик матбуот хизмати.

Унда хизмат фаолиятида юқори натижадорликка эришган, намунали хизмат фаолияти учун аҳоли ҳамда сафдошлари томонидан алоҳида эътироф этилган бир гуруҳ ходимлар муносиб тақдирланган. Шу билан бирга, хизмат фаолиятида жиддий камчиликларга йўл қўйган соҳавий хизматлар ҳамда ҳудудий ИИБ раҳбарлари фаолиятига ҳуқуқий баҳо берилган.

Хусусан, қуйидагилар эгаллаб турган лавозимидан озод этилди:

• вилоят ИИБ Маънавий-маърифий ишлар ва кадрлар билан таъминлаш хизмати бошлиғининг ўринбосари;
• вилоят ЙҲХХ бошлиғининг Маънавий-маърифий ишлар бўйича ўринбосари;
• Рўйхатдан ўтказиш ва имтиҳон олиш бўлими бошлиғи;
• Кўкдала тумани ИИБ бошлиғи подполковник Шерзод Шокиров;
• Китоб тумани ИИБ бошлиғи подполковник Икром Тоғаев;
• Косон ва Касби туманлари ИИБ бошлиқларининг биринчи ўринбосарлари;
• Муборак тумани ва Қарши шаҳри ИИБ Жамоат хавфсизлиги хизмати бўйича ўринбосарлари.

Шунингдек, вилоят ИИБ бошлиғининг Жамоат хавфсизлиги бўйича ўринбосари, Тергов бошқармаси бошлиғи, Жамоат тартибини сақлаш бошқармаси бошлиғи, Йўл ҳаракати хавфсизлиги Қидирув-суриштирув бўлинмаси бошлиғи, Касби тумани ИИБ бошлиғи ва унинг Маънавий-маърифий ишлар бўйича ўринбосари, Қарши шаҳар, Косон ва Муборак тумани ИИБ бошлиқларига кескин интизомий жазолар қўлланди.

Йиғилишда асосий эътибор ички ишлар органларининг раҳбарлари ва соҳавий хизмат йўналишларнинг масъулларини иш натижадорлиги учун шахсий жавобгарлигини оширишга, ходимлар томонидан хизмат интизоми ва қонунчилик талабларига қатъий риоя этишларини назорат тизимини такомиллаштиришга қаратилди, дейилади хабарда.