Венесуэлага АҚШдан депортация қилинган мигрантларнинг биринчи гуруҳи етиб келди

Венесуэлага АҚШдан депортация қилинган 199 нафар мигрантни олиб келган биринчи самолёт қўнди, деб хабар беради Euronews.

Қайд этилишича, душанба куни эрталаб самолёт Каракас шимолидаги асосий халқаро аэропорт – Майкетияга етиб келган. АҚШ ва Венесуэла ўртасида дипломатик алоқалар мавжуд эмаслиги сабабли, мигрантларни олиб кетган самолёт дастлаб Техасдаги ҳарбий базадан ҳавога кўтарилган ва Гондурасга қўнган, у ердан эса мигрантлар бошқа самолёт орқали Венесуэлага жўнатилган.

«Ушбу инсонларнинг Қўшма Штатларда қолиши учун қонуний асоси йўқ. Келажакда Венесуэлага депортация рейслари доимий равишда амалга оширилишини кутяпмиз. Ноқонуний иммиграцияга қарши курашда ҳамкорлик қилгани учун Гондурас президенти Кастро ҳамда унинг ҳукуматига миннатдорлик билдирамиз», — дейилади АҚШ баёнотида.

Ўтган ҳафта Венесуэла президенти Николас Мадуро ва АҚШ президенти Доналд Трамп мигрантларни депортация қилиш тўғрисида келишувга эришган эди. Венесуэлага репатриация феврал ойида тўхтатилганди, бунга Оқ уй раҳбари Chevron компаниясини Жанубий Америка давлатида фаолият юритиш лицензиясидан маҳрум қилгани сабаб бўлган.

Рейсларни тиклаш бўйича қарор Вашингтон 238 нафар венесуэлаликни Салвадордаги CECOT мега қамоқхонасига жўнатганидан кейин қабул қилинган. АҚШ ҳукумати уларни «Трен-де-Арагуа» жиноий гуруҳига алоқадорликда айблаган. Шу билан бирга, депортация қилинган фуқароларнинг қариндошларига кўра, аслида бундай эмас, Вашингтон бўлса, далилларни эълон қилмаган.

«Миграция — жиноят эмас ва биз бунга муҳтож бўлганларнинг барчаси қайтарилмагунча ҳамда Салвадорга ўғирлаб кетилган биродарларимизни қутқармагунча тинчимаймиз», — дейди Венесуэла Миллий ассамблеяси раиси Хорхе Родригес Гомес.

Ўтган ҳафта Николас Мадуро ўз ҳукуматига АҚШда қўлга олинган венесуэлалик мигрантлар репатриацияси учун зарур бўладиган рейслар сонини оширишни буюрганди.