Ҳавайидаги энг фаол вулқон 200 метр баландликкача лава отди

Ҳавайида 2024 йил охирларида ҳаракатга келган Килауэа вулқонининг отилиши давом этмоқда. Унинг янги фаоллик фазаси 25 март куни бошланган ва эртаси куниёқ вулқон лавалари 200 метрдан ортиқ баландликка отилган.

Вулқоннинг ҳозирги ҳаракати 2024 йил 23 декабрда бошланган эди. Уч ой ичида жами 15 та фаоллик фазаси кузатилган бўлиб, улар 24 соатда 12 суткага қадар давом этган.

Вулқон ҳаракати туристларни жалб этган, улар хавфсиз масофадан туриб, табиат ҳодисасини кузатишлари мумкин. Халемаумау кратерлари четига ҳам бир нечта камера ўрнатилган — улар вулқон отилишини узлуксиз трансляция қилмоқда.

Лава оқимлари маҳаллий аҳолига таҳдид уйғотмайди, аммо вулқон газлари потенциал хавф туғдириши мумкин, айниқса, респиратор ва юрак-қон томир касаллиги бор инсонларда. Бундан ташқари, хавф туғдирувчи омиллардан бири «Пеле сочлари» деб аталувчи ипга ўхшаш вулқон шишасидан ҳосил бўлган лава толаларидир. Улар эриган базалтнинг чўзилиши натижасида шаклланади — шамол таъсирида узоқ масофаларга тарқалиб, инсон териси ёки кўзларига текканда, зарар етказиши мумкин.

Келауэа денгиз сатҳидан 1243 метр баландликда Ҳавайи оролининг жануби-шарқий қисмида жойлашган. У Тинч океани архипелагидаги энг фаол вулқон ҳисобланади. Масалан, Пуу-Оо кратери 40 йилдан ошиқ вақтдан бери — 1983 йилдан буён узлуксиз отилиб туради.

2018 йилда Килауэанинг фаол фазаси май ойидан августга қадар давом этган. Ўшанда лава сабаб маҳаллий аҳоли эвакуация қилинганди. Вулқон отилиши оқибатида юзага келган ёнғинлар натижасида 700 дан зиёд уй ёниб кетган.