Владимир Путин Пасха муносабати билан қисқа оташкесим эълон қилди

Россия Пасха байрами муносабати билан Украина билан урушда 30 соатлик оташкесим эълон қилди. Бу ҳақда президент Владимир Путин маълум қилди.

“Гуманитар нуқтайи назардан, бугун соат 18:00 дан бошлаб, якшанбадан душанбага ўтар кечаси – соат 00:00 гача Россия томони Пасха танаффусини эълон қилади. Бу вақт давомида барча ҳарбий ҳаракатларни тўхтатишни буюраман”, – деди Путин РФ қуролли кучлари бош штаби бошлиғи Валерий Герасимов билан учрашувда.

Россия президенти Украина томони “Россиядан намуна олишига” умид билдирди.

“Шу билан бирга, бизнинг қўшинларимиз танаффуснинг рақиб томонидан эҳтимолий бузилишлари ва провокациялар бўлишига, унинг ҳар қандай агрессив ҳаракатларини қайтаришга тайёр туриши керак”, – деди у.

Владимир Путин, шунингдек, АҚШнинг можарони тинч йўл билан ҳал қилишга интилишларини олқишлашини қўшимча қилди.

Украина томони ҳозирча Россиянинг ташаббусига муносабат билдирмади.

Аввалроқ АҚШ президенти Доналд Трамп россиялик ҳамкасбидан Украинада ўт очишни тўхтатиш таклифига “шу ҳафта охиригача” жавоб олишни кутаётганини айтганди.

Эслатиб ўтамиз, бундан олдин АҚШ воситачилигида Россия ва Украина ўртасида энергетика объектларига зарба бермаслик бўйича келишув бўлган, 18 мартдан бошланган келишув 1 ойга тузилганди. Бу муддат давомида икки томон ҳам доимий равишда бир-бирини келишувни бузганликда айблаб келди.