Саида Мирзиёева Шайх Зоид номидаги «Инсоний биродарлик» нуфузли мукофотининг халқаро ҳакамлар ҳайъати таркибига киритилди

Президент ёрдамчиси Саида Мирзиёева Мусулмон донишмандлар кенгаши бош котиби Муҳаммад Абдусалом билан учрашув ўтказди.

«Ислом дини асосида ётган умуминсоний ва маънавий қадриятларни қўллаб-қувватлаётгани учун мазкур нуфузли халқаро ташкилотга миннатдорлик билдираман. Президент Шавкат Мирзиёев раҳнамолигида Ўзбекистон конфессиялараро тотувликни, мамлакатимиз фахри бўлган ноёб ислом меросини тарғиб этиш борасида бутун дунёда ҳақли равишда эътироф этилмоқда», — деб ёзади президент ёрдамчиси.

Шунингдек, Саида Мирзиёева ҳар йили ўтказиладиган Шайх Зоид номидаги «Инсоний биродарлик» мукофотининг ҳакамлар ҳайъати таркибига киритилганимдан бениҳоя мамнун эканини билдирди.

«Фақат биргаликдаги саъй-ҳаракатларимиз билан биз бу дунёни янада яхшироқ қила оламиз», — дея таъкидлайди Саида Мирзиёева.

Шайх Зоид номидаги «Инсоний биродарлик» мукофоти — инсоният тараққиётига катта ҳисса қўшаётган жисмоний ва юридик шахсларга бериладиган нуфузли, мустақил глобал мукофотдир. У 2019 йил феврал ойида — Рим папаси Франциск ва Ал-Азҳар университети бош имоми Аҳмад Ал-Тойиб ўртасида Абу-Дабида бўлиб ўтган тарихий учрашув шарафига таъсис этилган. Улар ўшанда инсоний биродарлик тўғрисидаги ҳужжатни имзолаган эди.

2025 йилдаги ҳакамлар ҳайъати қуйидагилардан иборат:

• Макки Салл — Сенегал ва Африка Иттифоқининг собиқ президенти.
• Хосе Луис Родригес Сапатеро — Испаниянинг собиқ бош вазири.
• Жаҳон савдо ташкилоти бош директори — Нгози Оконжо-Ивеала.
• Кардинал Питер Кудво Аппиаҳ Турксон — Понтифик Фанлар академияси ва Понтифик Ижтимоий фанлар академиясининг маслаҳатчиси.
• Патрисия Скотланд — Миллатлар ҳамдўстлиги бош котиби.
• Муҳаммад Абдусалом — «Инсоний биродарлик» мукофоти бош котиби.