Канар оролларида ўтказилган операцияда салкам 4 тонна кокаин мусодара қилинди

Испания, Португалия, Буюк Бритнаия, Колумбия ва АҚШ полиция бўлинмалари махсус операция ўтказди. Унинг доирасида уюшган жиноий гуруҳнинг 48 аъзоси қўлга олинди.

Фото: AP

Канар оролларида Европол кўмагида ўтказилган операция доирасида Жанубий Америкадан Европа Иттифоқи давлатларига кокаин етказиб бериш билан шуғулланган уюшган жиноий гуруҳнинг 48 аъзоси қўлга олинди.

Қайд этилишича, 29 та манзилда ўтказилган тинтувлар давомида полиция 3,8 тонна кокаин, 69 та транспорт воситаси, жумладан, катер, ўқотар қурол ва 100 минг евро миқдорида пул маблағларини мусодара қилган.

Маълумотларига кўра, Испания, Португалия, Буюк Бритнаия, Колумбия ва АҚШ полиция бўлинмалари иштирокида ўтказилган «Қора соя» операцияси доирасида «кокаин контрабандаси билан шуғулланган энг йирик уюшган жиноий гуруҳлардан бирининг фаолиятига чек қўйилган». Операциядан олдин Канар оролларининг учаласида ҳам фаолият юритган жиноий гуруҳнинг тўрт ойлик тергови олиб борилган.

Жиноятчилар 11 та тезюрар катерлардан фойдаланиб, Бразилия ва Колумбиядан наркотиб ташувчи кемалар ёнига борган, сўнг кокаинни қирғоққа ташиган. Кейин эса кокаин Европага, жумладан, Буюк Британияга юборилган. Британия Жиноятчиликка қарши курашиш миллий агентлигининг маълум қилишича, операция доирасида ҳибсга олинлар орасида бир нафар Буюк Британия фуқароси ҳам бор.