Паркентда 3 бола сувга чўкиб ҳалок бўлди

Бир гуруҳ болалар Паркентсойнинг қуриган ўзанида ҳосил бўлган кўлмакка чўмилишга борган. Уларнинг 3 нафари сувга чўкиб вафот этган.

Фото: Ижтимоий тармоқларда тарқалган видеодан кадр

Ижтимоий тармоқларда Тошкент вилоятининг Паркент туманида 3 нафар бола сувга чўкиб ҳалок бўлгани ҳақидаги хабарлар тарқалди. Kun.uz ҳолатга ойдинлик киритди.

Kun.uz манбасига кўра, ҳодиса бугун, 14 июн куни соат 14:00 лар атрофида Паркент туманида содир бўлган. Бир гуруҳ болалар туманнинг Сурхи маҳалласи ҳудудидан ўтган Паркентсойнинг қуриган ўзанида ҳосил бўлган кўлмакка чўмилишга борган. Шунда болалардан 3 нафари сувга чўкиб, ҳалок бўлган.

Болаларнинг жасади кўлмакдан олиб чиқилган. Сувнинг чуқурлиги 2 метргача етган. Бу ерда чўмилиш мумкин бўлмаган.

Аввалроқ Самарқанд вилоятининг Пахтачи туманида ҳам икки нафар бола фермер даласидаги ҳовузга чўкиб ҳалок бўлганди.

#болалар #Паркент тумани