Андижондаги фабрика оқова сувлари билан канални ифлослантирди

Катта Жанубий Фарғона каналида оқ кўпиклар пайдо бўлди, сув таркибида нитрит ва нитрат тузлари, ишқор ва бўёқлар борлиги аниқланди.

Фото: Ўзгидромет / Булоқбоши тумани ҳокимлиги

Андижон вилояти, Булоқбоши тумани, Ширмонбулоқ ҳудудидаги канал трикотаж-тикув фабрикаси томонидан ифлослантирилгани маълум бўлди.

Булоқбоши тумани ҳокимлиги хабарига кўра, туман ҳудудидан оқиб ўтувчи катта Жанубий Фарғона каналида 26 июл куни эрталаб сув юзасида кўпиклар пайдо бўлган.

«Ушбу ҳолат бўйича дарҳол Санэпидқўм Булоқбоши тумани бўлими томонидан белгиланган тартибда сув намуналари олинди ва лаборатория таҳлиллари учун юборилди», дейилади хабарда.

Таъкидланишича, ҳолат вилоят прокуратураси томонидан назоратга олинган.

«Ўзгидромет» хабарига кўра, канал кўпикланиб кетгани ҳақидаги лавҳа ижтимоий тармоқларда тарқалгач, Экология қўмитаси ходимлари томонидан текширув ишлари олиб борилган.

Текширувлар натижасида канал сувининг физик ва кимёвий таркиби ўзгаргани аниқланган. Бунга сабаб сифатида трикотаж-тикув фабрикаси матоларни қайта ишлаш учун сарфлаган сувни каналга оқизгани кўрсатилган. Оқибатда сувнинг кўриниши ва таркиби ўзгарган. Сув таркибида нитрит ва нитрат тузлари, ишқор ва бўёқлар борлиги аниқланган. Фабрика номи хабарда келтирилмаган.

Таъкидланишича, Экология қўмитаси масъул ходимлари томонидан муаммо бартараф этилган.

Тайёрлаган: Сардор Юсупов

#Андижон #Булоқбоши #Жанубий Фарғона канали