Тошкентнинг Оҳангарон шоҳкўчасида пиёдалар учун 4 та йўлўтказгич қурилади

Тошкент ҳалқа автомобил йўлининг 42–47 км қисмида 4 та замонавий ер усти пиёдалар ўтиш йўлаги қурилиши режалаштирилган. Бу ҳақда Яшнобод тумани ҳокимлиги хабар берди.

Таъкидланишича, Оҳангарон шоҳ кўчасидаги бу иншоотлар «аҳолининг хавфсиз юриб ўтишини таъминлайди, транспорт оқимини яхшилайди ва йўл-транспорт ҳодисаларининг олдини олишга хизмат қилади».

Маълум қилинишича, қурилиш ишлари доирасида йўл бўйида жойлашган айрим «соғлом бўлмаган» дарахтлар, пойтахт экология бошқармаси руҳсати ва назорати остида бошқа жойга кўчирилмоқда ва ўрнига янги дарахтлар, кўчатлар экилмоқда. Янги экилган дарахтлар 3 йил давомида «мунтазам суғорилиб, парвариш қилинади».

Лойиҳалар қиймати ва молиялаштириш манбаси ҳақида маълумот берилмаган.