72 ёшли Путин ва Си «150 ёшгача яшаш» ва «умрбоқийлик» истиқболларини муҳокама қилди

Хитой раиси Си Жинпинг ва Россия президенти Владимир Путин Пекинда Иккинчи жаҳон уруши тугаганининг 80 йиллигига бағишланган ҳарбий парад олдидан замонавий технологиялар ёрдамида умр кўриш давомийлигини узайтириш имкониятларини муҳокама қилди. Bloomberg нашрининг маълум қилишича, уларнинг нутқидан парчалар расмий трансляцияга тушиб қолган.

Суҳбат Си ва Путин (бу вақтда уларнинг ёнида КХДР етакчиси Ким Чен Ин ҳам бор эди) парад бошланишидан олдин минбарга чиқаётганда бўлиб ўтган.

Лавҳа бошида Си хитой тилида «ҳозирги кунда» ва «70 ёшда» деган сўзларни айтгани эшитилади. Кейин Путиннинг таржимони рус тилида шундай деди: «Илгари одамлар камдан-кам ҳолларда 70 ёшгача яшаган, бугун эса 70 ёшда ҳам сени бола эканингни айтишади».

Шундан сўнг, Путиннинг сўзларини англаш мушкул, аммо хитойлик таржимон бу сўзларни Си Жинпингга «Биотехнологияларнинг ривожланиши туфайли инсон аъзоларини доимий равишда кўчириб ўтказиш мумкин ва одамлар ўзини тобора ёш ҳис қилиши ва ҳатто умрбоқийликка эришиши мумкин», деб етказгани эшитилади.

Си бунга жавобан «Башоратларга кўра, бу асрда 150 ёшгача яшаш имконияти бор», деди, шундан сўнг трансляция бошқа камерага ўтказилди.

Путин ва Си Жинпинг 72 ёшда. Путиннинг бешинчи президентлик муддати 2030 йилда тугайди, аммо 2020 йилда Россия Конституциясига киритилган ўзгартиришлар туфайли у олтинчи президентлик муддатига эга ва 2036 йилгача ҳокимиятда қолиши мумкин. Си Жинпингнинг амалдаги учинчи ваколат муддати 2028 йилда тугайди. Унгача Хитой раҳбарларидан ҳеч бири икки муддатдан ортиқ ҳокимият тепасида бўлмаган.