Президент педагогларни янада қўллаб-қувватлашга қаратилган янги ташаббусларни илгари сурди

Президент Шавкат Мирзиёев Ўқитувчи ва мураббийлар куни арафасида соҳа ходимлари билан мулоқот ўтказди. Таъкидланишича, онлайн тадбирга барча ҳудудлардан 40 мингдан зиёд педагоглар уланди.

Давлат раҳбари педагогларни янада қўллаб-қувватлашга қаратилган янги ташаббусларни илгари сурди:

- янги йилдан бошлаб камида 15 йил стажга эга бўлган олий тоифали педагогларга ипотека кредити бошланғич бадалининг 25 фоизи қоплаб берилади;

- келгуси ўқув йилида давлат олийгоҳларига ўқишга кирган педагоглар фарзандларининг контракт суммасига 30 фоиз чегирма берилади;

- ўқитувчилар янги таълим технологияларини кенг қўллаши учун компьютер харидига 10 миллион сўмгача имтиёзли кредит ажратилади;

- келаси йилдан педагоглар учун давлат хизматлари тўлови 2 карра камайтирилади;

- фан ўқитувчилари каби бошланғич таълим ўқитувчилари учун ҳам миллий сертификат бериш тизими жорий қилинади. Сертификат олганларга ҳар ойда 15 фоиз устама тўланади;

- бакалавр босқичини имтиёзли диплом билан битириб, мактабга ишга кирганларга автоматик равишда 2-малака тоифаси, магистрларга эса 1-малака тоифаси берилади;

- дунёдаги ТОП-300 олийгоҳлардан бирига ўқишга кирган педагогларга 20 минг долларгача имтиёзли таълим кредити ажратилади;

- рейтингда 100 таликка кирган мактаб ва боғча, 20 таликдаги техникум, ТОП-10 та олийгоҳ педагогларига йилига бир марта Ўзбекистон бўйлаб саёҳат қилиш учун самолёт ва поездлар чипта нархларига 15-20 фоиз чегирма берилади.