Мактаб ўқитувчиларидан B2 тил сертификатини талаб қилиш муддати 2026 йилгача узайтирилди

Мактабгача ва мактаб таълими вазирининг буйруғи билан мактабларда хорижий тил ўқитувчиларидан камида B2 даражадаги тил сертификатини талаб қилиш муддати 2026 йилгача узайтирилди.

Қайд этилишича, умумий ўрта таълим мактабларида фаолият олиб бораётган барча чет тили ўқитувчилари камида B2 даражадаги миллий ёки унга тенглаштирилган мос даражадаги халқаро сертификатга эга бўлиши лозимлиги талабини сақлаб қолган ҳолда, истисно тариқасида, амалда фаолият олиб бораётган ва талаб даражасидаги сертификатга эга бўлмаган педагоглар 2025 йил якунига қадар (жорий ўқув йилининг 1- ва 2-чораги давомида) ишини давом эттириши мумкин.

Энди чет тили ўқитувчиларидан йил якунига қадар чет тили бўйича миллий ҳамда халқаро сертификат имтиҳонларида иштирок этиши тўғрисида тилхат олинади.

Шунингдек, сертификатга эга ўқитувчилар унинг амал қилиш муддати ўқув йили давомида тугайдиган бўлса, уларга ўқув йили охирига қадар ишлаш имконияти берилади.

Буйруққа мувофиқ, туман (шаҳар) мактабгача ва мактаб таълими бўлимлари 1 декабрига қадар сертификатга эга бўлмаган ўқитувчилар учун қўшимча ўқув машғулотларини ташкил этади.

Вазирлар Маҳкамасининг 2021 йил 19 майдаги қарори билан, 2024−2025-ўқув йилигача мактаб, ўрта махсус ва профессионал таълим муассасаларининг чет тили ўқитувчилари камида B2 даражадаги сертификатга эга бўлиши керак. Бу талабни бажармаганлар билан меҳнат шартномаси бекор қилиниши ёки B2 сертификати бўлмаган ўқитувчилар ишга қабул қилинмаслиги белгилаб қўйилган.