Терговда бошқа, судда бошқа: ИИБ бошлиғи устидан судда тезкор ходим кўрсатмалари ўзгариб қолди

Фарғонада ИИБ бошлиғи ва унинг ўринбосари устидан суд ишида ОАВнинг иштироки чекланганди. 24 октябр кунги судда тингланган тезкор ходим Юсуфбек Ёқубовнинг кўрсатмалари тергов органига берган гувоҳлик кўрсатувидан кескин фарқ қилмоқда. Суднинг “давлат сири” баҳонаси билан ёпиқ қилиб қўйилиши унинг келгусида қонуний ва адолатли ўтишига шубҳа уйғотади.

{Yii::t(}

Ўтказиб юбориш 6s

Ўтказиб юбориш

24 октябр куни Фурқат тумани ИИБ мансабдорлари устидан навбатдаги суд мажлиси бўлиб ўтгани ва унда жабрланувчи аёл ечинтирилгани айтилаётган “тезкор тадбир” иштирокчиси бўлган ИИБ тезкор ходими Юсуфбек Ёқубов кўрсатмалари эшитилгани ҳақида маълум қилгандик.

Юсуфбек Ёқубовнинг тергов даврида берган кўрсатмалари билан суддаги кўрсатуви бир биридан кескин фарқ қилмоқда. Қуйида унинг 24 октябр куни суд мажлисида айтган ва Kun.uz мухбири ёзиб олган кўрсатмасини келтирамиз:

“2025 йил 17 апрел куни туман солиқ инспекцияси бошлиғи хизмат хонасига мактаб ўқувчисини олиб кириб кетди, деган хабар келиб тушди. Бу хабарни рўйхатдан ўтказмаганман. Тезкорлик билан ўша ерга бордик. Биз ҳовлига эшикдан кирдик, девордан сакраб ўтмаганмиз. Эшикдан кирган заҳоти 2-қаватга кўтарилдик. 2-қаватда солиқ бошлиғи ва мактаб директорини қип-яланғоч ҳолатда кўрдик. Бизга хабар берган шахс хизмат уйига мактаб формасидаги ёш қиз кириб кетди деганди. Кўрдикки, у ерда мактаб ўқувчиси эмас, мактаб директори экан. Шундан кейин бошлиқ ўринбосари Жасур Расулов бизга ҳаммаси жойида, пастга тушаверинглар, деди”.

Энди Юсуфбек Ёқубовнинг тергов даврида берган кўрсатмасига эътибор қаратамиз:

“...2025 йил 17 апрел куни Фурқат тумани давлат солиқ инспекцияси бошлиғи Қурбонали Абдураҳмоновнинг хизмат уйида Фурқат туман ИИБ ходимлари Жасур Расулов, Ғайрат Отақулов, Тоҳир Баширов, Соҳиб Назаров, Азиз Мамажонов, Аъзам Ҳамиджонов иштирокида ўтказилган кечиктириб бўлмайдиган ҳолдаги тезкор-қидирув тадбирини ўтказиш учун асос бўлган маълумотни Жасур Расуловга ҳам, бошқа шахсларга ҳам бермаганман. Менда давлат солиқ инспекцияси бошлиғи Қурбонали Абдураҳмонов хизмат уйига бирон бир шахсни, жумладан, вояга етмаган аёл кишини ёхуд қизни олиб кириб кетгани бўйича бирон бир маълумот ва хабар бўлмаган.

2025 йил 17 апрел куни соат тахминан 15:30 ларда ҳамкасбим Тоҳир Баширов билан бирга Фурқат тумани Томоша қишлоғида чет эл валютасини ноқонуний алмаштириш ҳолати юзасидан амалга оширилиши режалаштирилаётган тезкор тадбирни ўтказиш жараёнида турганимизда Тоҳир Башировнинг телефонига катта тезкор вакил Ғайрат Отақулов қўнғироқ қилди. Тоҳир Баширов телефонни ўчирганидан сўнг Ғайрат Отақулов унга туман марказига тезда етиб келишимизни, бошқа тезкор-қидирув тадбири борлигини айтганини гапирди. Менинг бошқарувимда бўлган, давлат рақами 40 М 831 SA белгили Nexia-2 машинамда Тоҳир Баширов билан бирга туман марказига етиб келдик.

Шундан сўнг Тоҳир Баширов Ғайрат Отақуловга қўнғироқ қилганида у бизга туман прокуратураси олдига етиб келишимизни айтганини тушунтирди. Шу сабабли биз бошқарувимдаги машинамда туман марказидан туман прокуратураси томонга қараб ҳаракатланиб бордик. Туман прокуратураси олдига етиб келганимиздан сўнг Тоҳир Башировга Ғайрат Отақуловга қўнғироқ қилиб, аниқ манзилни сўранг-чи, қаерга боришимизни айтсин, дедим. Кейин Тоҳир Баширов такроран Ғайрат Отақуловга қўнғироқ қилди ва қаерга боришимиз кераклигини сўради. Шунда Ғайрат Отақулов туман ИИБ бошлиғига бириктирилган хизмат уйи олдига келишимизни тушунтирди. Шунга кўра биз ушбу йўналиш бўйича ҳаракатланиб бордик.

Соат тахминан 15:45 ларда сектор раҳбарларининг хизмат уйлари жойлашган манзилга етиб келдик. У ерга етиб борганимизда туман ИИБ бошлиғининг биринчи ўринбосари Жасур Расулов давлат рақами 40 850 ZBA белгили, оқ рангли Nexia-2 автомашинасида турган экан. Ғайрат Отақулов, Соҳиб Назаров, профилактика инспектори Азиз Мамажонов, Аъзам Ҳамиджонов, вояга етмаганлар билан ишлаш гуруҳи инспектори Элбек Муҳаммаджонов хизмат уйлари олдида туришганини кўрдик. Ғайрат Отақуловнинг олдига етиб бориб, ундан нима бўлганини сўраганимизда, туман давлат солиқ инспекцияси бошлиғининг хизмат уйида қандайдир ноқонуний ҳолат бўлмоқда экан, шу сабабли хизмат уйига кириб, у ердаги ҳолатни аниқлаштириш керак, деди. Шунда Тоҳир Баширов ундан бирон бир асосимиз борми, деб сўраганида, Ғайрат Отақулов мен билмайман, мени ҳам чақиришди, ичкаридаги ҳолатдан хабарим йўқ, тезроқ у ерга кириб, нима бўлаётганини аниқлаш керак экан, деб гапирди. Ва гапига қўшимча қилиб, қимор бўляптими ёки 3-4 таси дори чекиб ўтирибдимикан, хуллас аниқлаштириш керак экан, деди.

Кейин барчамиз Жасур Расуловнинг хизмат машинаси олдига етиб бордик. Ғайрат Отақулов биринчи ўринбосар Жасур Расуловга барча ходимлар етиб келди, деб айтди. Сўнг Жасур Расулов туман давлат солиқ инспекцияси бошлиғининг хизмат уйи эшигини кўринглар-чи, очиқмикан, ичкаридаги вазиятни, ҳолатни билинглар-чи, деди. Шунда Аъзам Ҳамиджонов туман давлат солиқ инспекцияси бошлиғининг хизмат уйи эшиги очиқлигини айтди.

Биз ушбу хизмат уйи олдига етиб келиб, бирин-кетин ичкарига киришни бошладик. Дастлаб Соҳиб Назаров, ундан сўнг Тоҳир Баширов, сўнгра мен ва мендан кейин Ғайрат Отақулов, ундан сўнг эса профилактика инспекторлари Аъзам Ҳамиджонов ва Азиз Мамажонов кириб келишган. Туман давлат солиқ инспекцияси бошлиғи Қурбонали Абдураҳмоновнинг хизмат уйига кириб борганимизда 1-қаватда ҳеч ким бўлмаган, 2-қаватдан аёл ва эркак кишининг овози эшитилаётгани сабабли барчамиз зина орқали 2-қаватга кўтарилганмиз. Зинадан кўтарилиб, тўғридаги хона эшиги олдига етиб келиб, эшикни очганимизда Қурбонали Абдураҳмонов яланғоч ҳолатда эшик олдида турган эди. Хонадаги диванда кейинчалик билишимча 29-мактаб директори Гулираъно Қосимова ҳам яланғоч ҳолатда ётган эди.

Гулираъно Қосимова бизларни кўриб, дарҳол устига қизил рангли чойшабни ташлаб, диван ва девор орасидаги жойга ярим ўтирган ҳолда туриб олди ва баланд овозда кимсанлар, деб бақириб юборди. Унинг бақирганини эшитган Жасур Расулов ва Ғайрат Отақулов ҳам бизнинг олдимизга чиқиб келишди ва бўлган ҳолатни кўриб, Қурбонали Абдураҳмонов ва Гулираъно Қосимовага устингизга бирон нима кийиб олинглар, ўзингизни босинг, деб айтди. Мен ушбу ҳолатни ўзимга тегишли бўлган Samsung А33 русумли телефон аппаратимга видеотасвирга олганман. Бироқ ушбу видеотасвирларни 2025 йил 17 апрел куни биринчи ўринбосар Жасур Расуловга Telegram орқали ташлаб берганимдан сўнг ўзимдан ўчириб юборганман. Шунингдек, ушбу телефон аппаратимни ҳам ҳозирга қадар сотиб юборганман”.

Юсуфбек Ёқубовнинг терговда берган кўрсатмаларининг энг муҳим жиҳатларига тўхталсак:

• “менда давлат солиқ инспекцияси бошлиғи Қурбонали Абдураҳмонов хизмат уйига бирон бир шахсни, жумладан, вояга етмаган аёл кишини ёхуд қизни олиб кириб кетгани бўйича бирон бир маълумот ва хабар бўлмаган;
• “туманнинг Томоша қишлоғида чет эл валютасини ноқонуний алмаштириш ҳолати юзасидан амалга оширилиши режалаштирилаётган тезкор тадбирни ўтказиш жараёнида турганимизда Тоҳир Башировнинг телефонига катта тезкор вакил Ғайрат Отақулов қўнғироқ қилди. Тоҳир Баширов телефонни ўчирганидан сўнг Ғайрат Отақулов унга туман марказига тезда етиб келишимизни, бошқа тезкор-қидирув тадбири борлигини айтганини гапирди”;
• “Ғайрат Отақуловнинг олдига етиб бориб, ундан нима бўлганини сўраганимизда, туман давлат солиқ инспекцияси бошлиғининг хизмат уйида қандайдир ноқонуний ҳолат бўлмоқда экан, шу сабабли хизмат уйига кириб, у ердаги ҳолатни аниқлаштириш керак, деди”;
• “бирон бир асосимиз борми, деб сўраганида, Ғайрат Отақулов мен билмайман, мени ҳам чақиришди, ичкаридаги ҳолатдан хабарим йўқ, тезроқ у ерга кириб, нима бўлаётганини аниқлаш керак экан, деб гапирди”.

Бундан ташқари, тезкор ходими Юсуфбек Ёқубовнинг суддаги “Бизга хабар берган шахс хизмат уйига мактаб формасидаги ёш қиз кириб кетди деганди”, деган кўрсатмаси ҳолат бўйича Фурқат туман ИИБда “102” хабари бўйича расмийлаштирилган ҳужжатга ҳам тескари. Ушбу ҳужжатда “шахсини сир сақлаган фуқаро Фурқат тумани ДСИ ходими Фурқат тумани “Чиркай” МФЙ Мустақиллик кўчасида жойлашган коттеж уйларнинг бирига бир аёлни жинсий алоқа қилиш учун олиб кириб кетгани” қайд қилинган. Яъни хабар берувчи (Гулираъно Қосимова ишнинг бу қисми ҳам уюштирилганини айтганди) дўкондор “мактаб формасидаги ёш қиз” эмас, “бир аёл” ҳақида гапирган.

Суддаги кўрсатувлар терговдагиси билан солиштирилса, ИИБ ходимлари асл вазиятни яширишга, имкон қадар солиқ идораси раҳбари ҳамда  Гулираъно Қосимова манзилига “лой чаплаш”га, энг муҳими бу орқали судни чалғитишга ҳаракат қилаётганини тушуниш қийин эмас.

Очиқ суднинг ОАВ вакиллари (очиқ суд мажлисида оммавий ахборот воситаларидан фақат Kun.uz мухбири иштирок этмоқда) учун ёпиб қўйилиши, боз устига суд раисининг жабрланувчи Гулираъно Қосимовадан суд мажлисидаги гапларни учинчи шахсларга тарқатмаслик бўйича тилхат олиши бундан кейинги суд жараёнларининг адолатли ва қонуний ўтишига соя солмай қўймайди.

Ёдингизда бўлса, ҳолат жамоатчиликка ошкор бўлгач, Сенатнинг Мудофаа ва хавфсизлик масалалари қўмитаси қонунбузилиши ҳолатининг ҳар қандай кўринишига муросасиз эканини билдирган ва мазкур ҳолатни назоратга олганди. Сенатнинг Хотин-қизлар масалалари қўмитасида доимий асосда ишловчи сенатор Малика Қодирхонова ҳам масаладан четда эмаслигини билдирган, тергов ва суд жараёнлари очиқ ва холис бўлиши, жабр кўрган аёлнинг ҳуқуқлари тўлиқ тикланиши зарурлигини айтганди.

Олий суд ЖИБ Қува тумани суди раиси Авазбек Раҳимовнинг мазкур ишда ОАВ (Kun.uz мухбири) иштирокини чеклаш тўғрисидаги ажримининг холислигини ўрганиб қўйса, зарар қилмасди.

Ҳар ҳолда “қарға қарғанинг кўзини чўқимайди” деган гап бор…

Мавзуга оид:

Руслан Сабуров,
Kun.uz