Петербургда мигрантларга курьер бўлиб ишлаш имконияти ёпилди

3 ноябрдан бошлаб Санкт-Петербургда хорижий курьерлар учун «Самокат» ва «Яндекс Еда» етказиб бериш хизматларига кириш ёпилди. Энди улар сменага чиқолмайди ва иловалар орқали буюртма ололмайди, деб ёзди «Аргументы и факты» нашри.

Гап патент бўйича ишлаётган Озарбойжон, Ўзбекистон, Тожикистон, Молдова ва Украина фуқаролари ҳақида бормоқда. Бу ЕОИИ мамлакатлари фуқароларига тааллуқли эмас, улар патентсиз ишлаши мумкин.

Август ойида Санкт-Петербург губернатори Александр Беглов мигрантларнинг курьерлик хизматларида ишлашини тақиқловчи қарорни имзолаган эди. Шаҳарда таксилар учун шунга ўхшаш чекловлар аллақачон жорий этилган - компанияларга кадрлар сиёсатини ўзгартириш учун уч ой вақт берилган. Санкт-Петербург расмийлари бу чорани яширин бандликка қарши кураш, хизматлар сифати ва хавфсизлигини ошириш, россияликлар - ёшлар ва талабалар учун иш ўринлари яратиш билан изоҳламоқда.