Тошкентдаги кўп қаватли уй лифтларида 37 мингдан ортиқ носозлик қайд этилди

Тошкент шаҳридаги кўп квартирали уйларда ўрнатилган 9147 та лифтда жами 37103 та камчилик аниқланди. Бу ҳақда саноат хавфсизлигини таъминлаш бўйича Тошкент шаҳрида амалга оширилаётган назорат-профилактика тадбирларига бағишланган матбуот анжуманида айтилди.

Саноат, радиация ва ядро хавфсизлиги қўмитаси бошлиғи Олимжон Жўраев маълум қилганидек, Тошкент шаҳар ҳудудий бошқармаси йил бошидан буён 121 та назорат тадбири, 10381 та профилактика тадбири ҳамда 2 755 та корхона ходимларининг билим синовларини ўтказди. Унда 1145 та қонун талаблари бузилиши аниқланди. Мазкур ҳолатларга йўл қўйган 135 нафар шахсга маъмурий жазо чоралари қўлланди.

Олимжон Жўраев сўзларига кўра, 8 сентябрь куни Тошкент шаҳри Чилонзор туманида “Do'mbirobod City” турар жой қурилиш объектида кран қулаб тушиши оқибатида битта ўлим қайд этилган ва 2 та оғир жароҳатланиш рўй берган. Келгусида шунга ўхшаган ҳолатларнинг олдини олиш мақсадида бошқарма тегишли чораларни кўрган.

Шу билан бирга, Тошкент шаҳридаги барча 17 та маданият ва истироҳат боғлари ҳамда кўнгилочар масканларда ўрнатилган аттракционларнинг 45 тасида техник паспорти мавжуд эмаслиги, 23 тасида аттракционларга соз ҳолатда хизмат кўрсатиш ва хавфсиз фойдаланиш учун масъул шахс тайинланмагани ҳамда 39 та аттракцион мавсум олдидан бериладиган рухсатномаларсиз ноқонуний фаолият олиб бораётгани қайд этилган ва уларнинг фаолияти тўхтатилган.

Тегишли топшириқларга асосан республикадаги барча лифтлар, жумладан, Тошкент шаридаги кўп квартирали уйларда ўрнатилган 9147 та лифт ускуналари текширилган. Ўрганишлар натижасида аниқланган камчиликлар “Хавфсиз лифт” платформасига Тошкент шаҳар туман ҳокимликлари томонидан киритилди. Тошкент шаҳридаги кўп квартирали уйларда ўрнатилган 9 147 та лифтда жами 37 103 та камчилик аниқланган.

– Вазирлар Маҳкамасининг тегишли қарорлари билан қабул қилинган регламентга мувофиқ, лифтларнинг техник ҳолатини жамоатчиликка хабардор қилиш мақсадида лифт кабинасига яшил (яроқли), мовий (қисман носоз), сариқ (носоз) ва қизил (фойдаланиш учун хавфли) стикерлар ёпиштирилади. Мазкур техник регламентларни 2026 йил 1 июлдан кучга кириши инобатга олиб, барча носоз лифтлардан фойдаланиш тақиқланади. Пойтахтимиз фуқароларини авария ва бахтсиз ҳодисалардан ҳимоя қилиш ва уларнинг ҳуқуқий саводхонлигини ошириш мақсадида 6844 та техник синовдан ўтмаган лифтга “Лифт техник кўрикдан ўтказилмаган” ёзувли ёрлиқлар ёпиштирилди, деди Жўраев.