Автомобилни сотишда юрган масофасини яширганлик учун жавобгарлик белгилаш таклиф этилди

Ўзбекистонда транспорт воситасининг одометр кўрсаткичларига ўзгартиришлар киритиш ёки одометрни алмаштириш тўғрисида хабардор қилмаганлик учун маъмурий жавобгарлик жорий этиш таклиф қилинди. Бундай қоидабузарлик учун 4,1 миллиондан 6,1 миллион сўмгача жарима қўлланиши мумкин.

Фото: Ижтимоий тармоқлар

Олий Мажлис Қонунчилик палатаси томонидан Ўзбекистонда автомобилни сотишдан олдин босиб ўтган масофасини ўзгартириш фактини яширганлик учун маъмурий жавобгарликни жорий этиш таклиф қилинмоқда. Лойиҳа жамоатчилик муҳокамасига қўйилди.

Ҳозирги кунда фойдаланилган транспорт воситаларини қиммат нархларда сотиш мақсадида одометр кўрсаткичини сохталаштириш ҳолатлари кузатилаётганига эътибор қаратилган.

Ҳужжатга кўра, Маъмурий жавобгарлик тўғрисидаги кодексни 121–1-модда (Транспорт воситасининг одометр – транспорт воситасининг босиб ўтган масофасини кўрсатадиган табло – кўрсаткичларига ўзгартиришлар киритиш ёки одометрни алмаштириш тўғрисида хабардор қилмаслик) билан тўлдириш таклиф этилмоқда.

Бунда транспорт воситаси эгаси у сотилгунга қадар харидорни транспорт воситасининг босиб ўтган йўлини қайд этувчи одометр ускунаси кўрсаткичлари ўзгартирилгани ёки одометр ускунасининг ўзи алмаштирилгани тўғрисида хабардор қилмаса, БҲМнинг 10 бараваридан 15 бараваригача (4,12 млн сўмдан 6,18 млн сўмгача) миқдорда жарима солишга сабаб бўлади.

Лойиҳа муҳокамаси 20 ноябрга қадар давом этади.

Тайёрлаган: Азиз Қаршиев

#қонунчилик #одометр