"Пул ғурурдан устун эмас" - Wizz Air камситган ўзбекистонлик авиакомпаниянинг компенсациясини рад этди

Kun.uz бундан бир неча ой аввал Wizz Air’ни дискриминацияда айблаган юртдошимиз Суҳроб Убайдуллаев билан суҳбат эълон қилганди. Гитараси синдирилгани учун қўшиқ куйлаб, United Airlines авиакомпаниясини шарманда қилган канадалик қўшиқчи Дейв Керролл ҳам яқинда Суҳроб билан клип эълон қилди. Маълум бўлишича, Wizz Air алоқага чиқиб, 120 минг евро компенсация таклифини берган, бироқ йигит буни рад этган.

Бундан 2 йил аввал Римдан Абу-Даби орқали Самарқандга чипта олган Суҳроб ҳеч қандай тушунтириш ва сабабларсиз самолётга чиқарилмаган. Воқеа тафсилотларини у Kun.uz билан суҳбатда батафсил айтиб берган эди.

Гитарасини синдиргани учун қўшиқ айтиб, бутун дунёга United Airlines компаниясини шарманда қилган канадалик санъаткор Дейв Керролл ҳам яқинда Суҳроб учраган воқеага атаб қўшиқ куйлади.

Маълум бўлишича, айнан  шу клипни суратга олишда 100 дан ортиқ одам қатнашган. Суҳроб ўзбекистонлик бўлгани учун Канада билан уни боғловчи нуқта керак эди. Қўшиқчи Керролл эса клип саҳналаридан бирини стадионда олиб, бу билан Ўзбекистоннинг жаҳон чемпионатига чиққан жамоасини эслатмоқчи бўлган. Суҳроб қўшиқчи билан учрашиш учун 40 кун ҳаракат қилган, икки марта Канадага бориб келган. 

“Дейв Керролл Wizz Air авиакомпанияси ростданам бу юртдошимизга нисбатан дискриминация қилган-қилмаганини юристлари билан текширди. Қўшиқчи мендан ҳеч нимани яширмаслигимни, борича айтишимни сўради. Аввалига ишонмади, текшириб чиққач, ёрдам беришга қарор қилди”, - дейди Суҳроб Убайдуллаев. 

У Канадага боришидан аввал британиялик адвокатларга мурожаат қилади. Ўшанда Wizz Air авиакомпанияси бўлаётган қоғозбозликлардан хабар топиб, алоқага чиқади. Йигитдан қайтиб шикоят қилмасликни, жим юришини сўраб, эвазига жами 120 минг евро таклиф қилади. 

“Лондонда эканимда менга қўнғироқ қилишди. 120 минг евро беришлари, эвазига эса ҳеч қандай узр сўрамасдан, бундан буёғига компания ҳақида гапириб чиқмаслигимни сўрашди. Мен устозларим билан маслаҳат қилдим ва буни рад этдим”, дейди Суҳроб. 

Суҳроб ва Дейв Керроллнинг клипи қарийб 100 минг киши томонидан кўрилган. Шу клипдан кейин Wizz Air’нинг бозордаги акциялари нархи тушиб бормоқда. Вазиятга қанчалик боғлиқ-боғлиқ эмас номаълумки, лекин Wizz Air энди бизнес класс ўриндиқлари бўлиши ҳақида ҳам эълон берди. Ваҳоланки, қўшиқчи ўз асари номини “Wizzness классда учманг” деб номлаган. Санъаткор бу авиакомпаниянинг хизматлари оддий классдан ҳам паст демоқчи бўлиб, “Wizness class” жумласини ишлатган.

“Бу авиакомпания самолётларида бизнес класс йўқ ва бор ўриндиқлар ҳам ноқулайроқ деб ўйлайман. Айнан бизнинг мусиқий клипимиздан сўнг Wizz Air энди ўз бортларида бизнес ўриндиқлар бўлишини ҳам эълон қилди. Буни менга Дейв айтиб, қўшиғимиз таъсири бўлиши мумкинлигини қўшимча қилди”, дейди Суҳроб. 

Суҳроб ва Дейв Керролл энди Wizz Air реакциясига биргаликда жавоб беришади. Компенсация борасида ҳам келишиб қарор қиладиган бўлишган.

Клип эълон қилинган кунда Дейв Керролл ўзбек халқига мурожаат қилиб, бу мусиқий чиқишга бефарқ бўлмасликни сўради. 

“Ўзбекистонлик янги дўстим Суҳроб билан мусиқий клипимизни эълон қилдик. У йўловчилар учун парвозларни хавфсизроқ ва яхшироқ амалга оширишга ундайди. Авиакомпаниялар эса шу йўл билангина ҳурматга сазовор бўлиши керак. Мен Ўзбекистон ҳақида деярли ҳеч нарса билмасдим, биргина шу ҳолат сабаб энди мен сиз ҳақингизда кўп нарсани биламан. Яқинда футбол жамоангиз 2026 йилги жаҳон чемпионатига йўлланма олганини ҳам эшитдим ва ўша ўйинларнинг аксарияти айнан шу ерда, Канадада бўлиб ўтади. Шу сабабли, ёзда жамоангиз ва мухлисларингизни бу ерда кутиб олишни интизорлик билан кутяпман. Мусиқий клипга бефарқ бўлманг, у мижозларга муносиб ҳурмат кўрсатишни таъминлаш учун қилинди”, дейди канадалик қўшиқчи Дейв Керролл.

Шоҳрух Мажидзода тайёрлади.