Мбаппе ва ПСЖ судда бир-биридан 200 млн евродан ортиқ талаб қилди

Мбаппе клубни ўзига нисбатан ёмон муносабатда бўлганликда айблади, клуб эса уни фойдали трансфер келишувини бузганликда айбламоқда.

Фото: Getty images

Франция миллий жамоаси сардори Килиан Мбаппе шартномани узайтиришдан бош тортганидан кейин «Пари Сен-Жермен» клубини ўзига нисбатан ёмон муносабатда бўлганликда айблади ва 263 миллион евро товон пули талаб қилди. Ўз навбатида ПСЖ Мбаппени «Ал-Ҳилол» билан келишувни бузганликда айблаб, 240 млн евро талаб қилди.

Le Monde хабарига кўра, можаро бўйича суд жараёни 17 ноябрь куни меҳнат низолари бўйича Париж судида бошланди.

Мбаппе фикрига кўра, 2023/24 йилги мавсум бошида клуб янги шартномага рози бўлмагани учун ўзини ўйинлардан четлатган ва сотилиш арафасида турган футболчилар билан машғулот ўтказишга мажбурлаган. Бу ҳолат бўйича Франция футболчилар касаба уюшмаси ҳам ўтган йили шикоят қилган эди.

Мбаппе 2023 йилда ПСЖ клубининг Осиё бўйлаб мавсумолди турнирига таклиф қилинмади ва мавсумнинг биринчи ўйинини ўтказиб юборди, аммо кейинчалик клуб билан музокаралардан сўнг таркибга қайтарилди. У ПСЖ клуби таркибида 308 та ўйинда 256 та гол урди.

Ўз навбатида, ПСЖ Мбаппени Саудия Арабистонининг «Ал-Ҳилол» клуби билан 300 млн евролик трансфер келишуви барбод бўлишида айбдор деб ҳисобламоқда, ушбу ҳолатда футболчи трансфердан бош тортган эди.

2024 йилда Мбаппе эркин агент сифатида Мадриднинг «Реал» клубига ўтди.

Тайёрлаган: Сардор Юсупов

#Реал #ПСЖ #Килиан Мбаппе