«Мен сени ҳимоя қиламан» – Трамп ва Мамдани учрашуви мақтовларга бой ва жуда илиқ ўтди

21 ноябрь куни АҚШ президенти Доналд Трамп Оқ Уйда Ню Йорк шаҳрининг янги сайланган мэри Зоҳран Мамданини кутилмаган тарзда илиқ ва дўстона қабул қилди. Хусусан, президент Доналд Трамп бу йил Овал офисда бир нечта драматик қарама-қаршиликларга сабаб бўлган эди. Шунда келиб чиқиб, кўпчилик бу учрашувдан ҳам «портлайдиган воқеалар» кутганди. Аммо уларнинг иккиси ҳам журналистлар олдида кутилмаган даражада сокин ва самимий чиқишлар қилиб, очиқ қарама-қаршиликка бормади.

Трамп илгари Мамданини «коммунист телба» ва «мутлақ эс-ҳушдан айрилган одам» деб атаган бўлсада, Мамдани эса Трамп маъмуриятини «авторитар» деб таърифлаганди.

Икки етакчи тахминан 45 дақиқа учрашишди. Мамдани Оқ уй Ғарбий бўлими бўйлаб экскурсия ҳам қилди. Бу экскурсия Кабинет хонасига ташрифни ўз ичига олди, у ерда Трамп иккиси Франклин Рузвелт портрети қаршисида суратга тушди.

Президент маслаҳатчилари айтишича, Трамп учрашув муваффақиятли бўлишига қатъий бел боғлаган, сўнгги икки кун ичида у ҳақида шахсий суҳбатларда мақтов билан гапирган.

Associated Press нашрининг ёзишича, учрашув иккала сиёсатчи учун ҳам имкониятлар яратди. Хусусан, Мамдани АҚШнинг «энг қудратли» шахси билан юзма-юз суҳбатлашиш имкониятига эга бўлди. Трамп учун эса «яшаш харажатлари бўйича сайловчилар хавотирларига жавоб бериш зарурати ошаётган» вақтда арзонлаштириш масаласида чиқиш қилиш имконияти яралди.

Улар нималарни гаплашди?

Мамдани ва Трамп уй-жой арзонлиги, озиқ-овқат ва коммунал хизматлар нархи ҳақида гаплашишганини айтишди. Мамдани сайловларда инфляциядан келиб чиққан норозилик кайфиятини ўз ғалабасига айлантирганди.

«Унинг айрим ғоялари меники билан бир хил,» деди президент Мамданининг инфляция борасидаги қарашлари ҳақида.

У айрим пайтларда ҳатто Мамданини ҳимоя қилаётгандек кўринди: бир неча саволларда унинг ўрнига аралашди. Масалан, журналистлар Мамданига президентни аввал «авторитар» деб атаганини аниқлаштиришни сўраганида, Трамп: «Мени бундан ҳам баттарроқ деб аташган. Шунинг учун бу унчалик ҳам оғир эмас», деди.

Журналист Мамданига «ҳали ҳам Трампни фашист деб ҳисоблайсизми?» деб савол берганда, у жавоб беришга улгурмай, Трамп ўртага қўшилди: «Ҳечқиси йўқ, шунчаки 'ҳа' деб қўя қол. Майлими? Тушунтиришдан осонроқ. Мен эътироз қилмайман», деди Трамп.

Яна бир журналист Мамдани нима учун камроқ ёқилғи сарфлайдиган транспорт ўрнига самолётда Вашингтонга келганини сўраганида, Трамп яна аралашди. «Агар у учган бўлса, бу анча тезроқку. Бу [Ню Йоркдан Вашингтонгача – Таҳр.] жуда узун йўл. Мен сени ҳимоя қиламан», деди Трамп.

Январда лавозимга киришадиган Мамдани Ню Йоркни янада арзонроқ қилиш йўлларини муҳокама қилиш учун Трамп билан учрашувни ўзи сўраганини айтди. Трамп унга ёрдам беришни хоҳлаётганини айтди. Трамп аввалроқ, шаҳарга қўшимча ёрдамни кесиш фикридан қайтганини билдирди. «Бундай бўлишини истамаймиз. Менимча, бундай бўлмайди ҳам,» деди у.

Трамп ҳатто Мамданининг кўпроқ уй-жой қуриш ҳақидаги сиёсатини маъқуллагандек бўлди. «Бу одамларни ҳайратда қолдиради, лекин мен ҳам худди шуни кўришни истайман. Баъзи ғоялари меники билан бир хил. У қанчалик яхши ишласа, мен шунчалик хурсанд бўламан», деди Трамп.

Reutersʼнинг ёзишича, Трамп – Ню Йоркнинг биринчи мусулмон мэри бўладиган Мамданини унга қарши айтилган айрим исломофоб ҳақоратлардан ҳам ҳимоя қилди. Бир журналист Трампдан ёнида «жиҳодчи» турибдими, деб сўради. «Йўқ, ундай эмас,» деди Трамп Мамдани унга қараб турган пайтда. «Мен билан жуда рационал инсон учрашди. Мен билан Ню Йоркнинг яна буюк бўлишини чин дилдан истайдиган инсон учрашди», деди Трамп.

Бир журналист Трампдан Мамдани бошқарадиган шаҳар бошига қайтиб келишни ўйлаяптими, деб сўради. «Ҳа, албатта,» деди Трамп. «Айниқса, бу учрашувдан кейин.»

Эски «рақиблар»

Бу йил Ню Йоркдаги мерлик пойгасига Трамп кўп марта таъсир қилишга уринди. У сайлов арафасида у мустақил номзод, собиқ демократ губернатор Эндрю Куомони қўллаб-қувватлади. Агар Мамдани ғолиб бўлса, шаҳарнинг «муваффақиятга, ҳатто омон қолишга ҳам ноль имконият» борлигини айтди.

У ҳатто Угандада туғилган, бир неча йил олдин АҚШ фуқаролигини олган Мамданининг фуқаролигини шубҳа остига олди. Уни ҳибсга олиши мумкинлиги ҳақида ҳам айтганди.

Мамдани эса Трамп қўллаган номзодни президентнинг «қўғирчоғи» деб атаган. «Доналд Трампга қарши тура оладиган ва ҳақиқатан натижа бера оладиган мер» бўлишга ваъда берди. У ҳатто бир дебат давомида «Мен Доналд Трампнинг энг даҳшатли тушиман. Чунки мен прогрессив, мусулмон муҳожирман ва ўзим ишонадиган қадриятлар учун курашаман» деган эди.

Шунга қарамай, бир-бири билан илк бор кўришганидан камида бир соат ўтмай, Трамп матбуотнинг кескин саволларидан Мамданини ҳимоя қилишга бир неча бор шошилди. «Уларнинг ўзаро айтган «аччиқроқ» ҳақоратлари ҳақида эслатилганида, икковлари кулиб юборди».

New York Times'нинг ёзишича, Трампнинг Мамданига бўлган илиқлиги қисқа муддатли бўлиши мумкин. Айниқса Мамданийга ҳужум қилиш – президент ва унинг партияси учун сиёсий фойдали бўлиб қолса.